Cerca

Vatican News
Kardinali Pietro Parolin në Konferencën për Klimën Cop24 në Katowice të Polonisë Kardinali Pietro Parolin në Konferencën për Klimën Cop24 në Katowice të Polonisë 

Kard. Parolin në Cop24: politika për klimën është çështje morale dhe etike

Sekretari i Shtetit të Vatikanit, kardinali Pietro Parolin, flet në konferencën mbi klimën Cop24, që vijon në Katowice të Polonisë. Kërkon rregulla dhe mekanizma institucionale, që lehtësojnë zbatimin e Marrëveshjes së Parisit.

R.SH. - Vatikan

Vijon në Katowice të Polonisë, Takimi Botëror mbi Klimën Cop24, megjithëse ndihet mungesa e krerëve të shteteve të mëdha si presidenti amerikan Donald Trump dhe kancelarja gjermane Angela Merkel. Dje, foli Sekretari i Shtetit të Vatikanit, kardinali Pietro Parolin, i cili vuri në dukje urgjencën e ndërhyrjes sa më të shpejtë, për t’u vënë fre pasojave të ndryshimit të klimës, për shkak të veprimtarisë së njeriut.

Ndryshimet e klimës janë çështje morale dhe etike

         “Ndryshimet klimatike – nënvizoi kardinali – janë edhe çështje morale e jo vetëm teknike”. Për Selinë e Shenjtë, programi i luftës kundër ngrohjes globale duhet të ketë “baza etike” e të realizojë tre qëllime: të mbrojë e të respektojë dinjitetin e njeriut; të pakësojë e të zhdukë varfërinë; si edhe të zbusë ndryshimet e klimës në mënyrë të përgjegjshme, duke menduar për të sotmen e për të ardhmen. Mendimi i Selisë së Shenjtë, bazuar edhe në enciklikën “Lëvduar qofsh” të Papës Françesku, është promovimi i një procesi tranzicioni drejt një modeli zhvillimi, të lirë nga ato teknologji e qëndrime, që prodhojnë me shumicë gazin serë.

Mundësi pune

         Në programin e punës për të ardhmen, sipas Sekretarit të Shtetit të Vatikanit, duhet të bëjnë pjesë edhe parandalimi i spekullimeve dhe lufta kundër korrupsionit; promovimi i pjesëmarrjes së popullsive lokale në proceset vendimmarrëse; krijimi i vendeve të reja e dinjitoze të punës; ndihma për ata njerëz e popuj, që vuajnë më shumë nga ndryshimet e klimës.

Klima është problem i të gjithëve

         “Që problemet e klimës të konsiderohen etike – vijoi më tej kardinali Parolin – është e nevojshme që, përveç shteteve, të përfshihen edhe protagonistë të tjerë, shprehje e ‘zërit të njerëzve’… Nuk kemi alternativa; duhet të impenjohemi për të punuar në favor të ndërtimit të një shtëpie të përbashkët”, përfundoi Sekretari i Shtetit të Vatikanit.

04 dhjetor 2018, 12:37