ዘመነ ምጽኣት ካብ ድቃስ ሸለልትነት ፍቅሪ ብጻይ እንበራበረሉ እዩ! ር.ሊ.ጳ
አባ መኰንን አማኑኤል - ከተማ ቫቲካን
ናይ ዕለቱ ወንጌል ንምጽኣት ጐይታ ተሰናዲና ክንጸንሕ ዝዕድም ካብ ወንጌለ ማቴ 24.37 ‘ከምቲ ብዘመን ኖኅ ዝወረደ ምጽኣት ወዲሰብ ከኣ ኸምኡ ኪኸውን እዩ። ከምቲ ብእድሚ ማይኣይኂ ዝነበረ ቕንያት ክሳብታ ኖኅ ኣብ መርከብ ዝኣተወላ መዓልቲ ኪበልዑን ኪሰትዩን ከውስቡን ኪውሰቡን ዝጸንሑ እሞ ማይ ኣይኂ መጺኡ ንዅሉ ዜጥፍእ ዘይፈለጡ ምጽኣት ወድሰብ ከኣ ኸምኡ ኪኸውን እዩ’ ዝብል ነበረ።
እዚ ክፍሊ ወንጌል እዚ ሽሕ’ኳ ንካልኣይ ምጽኣት ዘዘኻኽር እንተኾነ ከምቲ ኣብ ዝሓለፈ ሳልስቲ ዘዘኻኽርዎ ወትሩ ንጐይታ ክንረክብ ሃረር ክንብል ምናዳ ኸኣ ኣብዚ ዘመነ ምጽኣት ነቲ መንገድታት እግዚአብሔር ክሕብረና ዝመጽእ ጐይታና ኢየሱስ ክርስቶስ ንክንቅንበል ዘሰናድወና ኅሩይ ግዜ እዩ ኢሎም።
ትጽቢት ብዙሕ ግዜ ሃንደበትነት እውን ስለዝውንን ጐይታ ክመጸና እንከሎ ምናልባት ከምቲ ንጽበዮን ንሓስቦ ዘይክኸውን ይኽእል ስለዚ ንሃንደበትነት ጐይታ ስንድዋት ክንከው። ሕያዋይን ሩሕሩሕን ስለዝኾነ ከኣ ሃንደበትነቱ ወትሩ ንሠናይና ምዃኑ ተገንዚብና ከምቲ ቃሉ ንኣኡ ብኣካል ኣብ ድኻታትን ጽጉማትን ጭኑቃትን ኣሕዋትናን ኣሓትናን ክንረኽቦ ስለእንኽል ነቲ ኣማኑኤል እግዚኣአብሔር ምሳና ዝኾነ ከምቲ ወትሩ ዝገብሮ ኣብ ማእከልና ስለዘሎ በዚ ምሩጽ ግዜ ንሥራሕ።
ትርጉምን ዕላማን ናብ ዝኾነ ክርቶስ ብምትእምማን ንገስግስ!
ዘመነ ምጽኣት ኣርባዕተ ሳምንታት ዝሓዘ ኰይኑ ንልደት መሰናደዊ ዝኾኑ ካብ ብሉይን ሓዲስን ኪዳን ከምኡ እውን ካብ ትምህርተ ኣበው ዝተፈላለየ ኣስተንትኖ ዝቀርበሉን መላእ ቤተ ክርስትያን ብፍሉይ ሱባኤ እትጸንሓሉ ፍሉይ ናይ ሱባኤ ግዜ እዩ። ኰይኑ ግን ይብሉ ቅዱስነቶም ናይ ግዜ ጐይታን ፈጣርን ዝኾነ ጐይታ ዕለት ዕለት ክርኽበና ስለዝመጽእ ነዛ ርግጽነት እዚኣ ሒዝና ብምትእምማን ናብኡ ንመልክት ከምቲ ኣብ ናይ ዕለቱ ቀድማይ ንባብ ትንቢት ኢሳያስ 2.2-4 ‘ኣብተን ዳሕሮት መዓልትታት ኪኸውን እዩ፡ ናይ ቤት እግዚኣብሄር ከረን ኣብ ርእሲ ኣኽራን ኪቐውም፡ ኣብ ልዕሊ ዂድዂዶታት ድማ ልዕል ኪብል፡ ኲሎም ኣህዛብውን ናብኡ ኺውሕዙ እዮም። ሕጊ ኻብ ጽዮን፡ ቃል እግዚኣብሄር ከኣ ካብ የሩሳሌም ኪወጽእ እዩ እሞ፡ ብዙሓት ህዝብታት ኪኸዱ፡ ንዑናይ ናብ ከረን እግዚኣብሄር፡ ናብ ቤት ኣምላኽ ያእቆብ ንደይብ፡ ንሱ ጐደናታቱ ኺምህረና፡ ብመገድታቱ ክንመላለስ ኢና፡ ድማ ኪብሉ እዮም። ኣብ መንጎ ኣህዛብ ኪፈርድ፡ ንብዙሓት ህዝብታትውን ኪዳንዮም እዩ፡’ ዝብሎ እቲ ሓቀኛ ከረን ሓቀኛ ቤተመቅደስ ኣምላኽ ዝኾነ ክርስቶስ ድሕሪ ምሥጢረ ሥጋዌ ብምሉእ ብምሉኡ ስለዝተገልጸን ንኩሉ ከኣ ናባኡ ስለዝስሕብን ናብኡ ነተኲር ብምሉእ ምትእምማን ከኣ ናብዚ ትርጉምን ፍጻሜን ታሪኽ ዝኾነ ጐይታና ኢየሱስ ክርስቶስ ገጽና ንገስግስ ኢሎም።
ንዓይ ይጥዓመኒ ዝብል መንገድታት ኣፍቅሮ ርእስ ውግእን ግጭትን ይወልዱ!
ቅዱስነቶም ናይ ዘመንና ዝዓበየ ጸገም ኣፍቅሮ ርእስ ወይውን ንዓይ ይጥዓመኒ ብዛዕባ ካልእ ምንም ኣይዓጠንን ዝብል ጥቅሚ ገዛእ ርእስኻን ምቾትን ጥራይ ናይ ምድላይ ሕማም ከምዝኾነ ምንጪ ኩሉ ናይ ግዜና ውግእን ግጭትን ከኣ እዚ ከምዝኾነ ገሊጾም።
ኣብነት ናይ ንቅሓትን ሓለዋን ዝኾነት ኣደና ኣደ ተስፋ ድንግል ማርያም ስለዝኾነት ናብ ፍቁር ወዳ ገጽና ብምትኳር ናብኡ ክንግስግስ ትደግፈናን ትምረሓናን ድሕሪ ቢሎም ጸሎተ መልአከ እግዚአብሔር ደጊሞም።
ጸሎተ መልአከ እግዚኣአብሔር ምስ ደገሙ ኣማስያኡ ናብቲ ቅዱስ ፍራንቸስኮስ ዘኣሲዚ ንፈለማ ግዜ በዓቲ ልደት ጐይታና ኢየሱስ ክርስቶስ ዝገበረላ ከተማ ግረቾ ክበጽሑ ምዃኖምን ትርጉም በዓቲ ልደት እትግለጽ ናብ ኩልና እትለኣኽ ሓጻር መልእኽቲ ኸኣ ኣብኡ ክታሞም ከምብሩላ ምዃኖም ገሊጾም።
ኣብ መወዳእታ ስለ ኢራቅ ክንጽሊ ሰላምን ስምምዕን ከውርደሎም ንጐይታ ንለምን ድሕሪ ቢሎም ከም ፍረ ናይ ዓሚ ሲንዶስ ኣበው ብዛዕባ መንእሰያትን ድሕረ ሲኖዶሳዊ ቃለ ምዕዳኖምን ብዓለምለኸ ደረጃ ኣማኻሪ ኣካል መንእሰያት ከምዘቆሙን እዞም ካብ ዝተፈላለያ ሃገራት ዓለምና ዝተመርጹ 20 መንእሰያት ምስ ላዕለዋይ ቤትጽሕፈት ምእመናን ሥድራቤትን ሕይወትን ብምዃን ሓዋርያዊ ኣገልግሎት መንእሰያት ከደንፍዑ ምዃኖም ብምግላጽ ስለኦም ክጽለ ብምምሕጻን ተሰናበቱ።
