Ambasadori Rrok Logu nё përvjetorin e kalimit nё Amshim
R.SH. - Vatikan
Sot mё 1 gusht kujtojmё Ambasadorin e pestё tё Shqipërisë pranë Selisë sё Shenjtё, Rrok Logun, nё përvjetorin e tretё tё kalimit nё amshim. Po e kujtojmё me nderim e mirёnjohje pёr punën e përkushtuar të tij në promovimin dhe përforcimin e marrëdhënieve ndërmjet Shqipërisë dhe Selisë së Shenjtë.
Rrok Logu jetoi me një fe të gjallë në Krishtin dhe atë e dëshmoi gjatë udhës së tij njerëzore si i krishterë, si kryefamiljar, si inxhier, si diplomat e si shqiptar. Shkodra, Tirana, Shqipëria, diplomacia dhe Kisha shqiptare ia kanë një borxh të madh mirënjohjeje e nderimi për atë që Rrok Logu bëri e dëshmoi deri sa ishte i ngarkuar me detyra të ndryshme e madje deri në ditën e 1 gushtit 2017, ku u kthye në shtëpinë e Atit Qiellor.
E nëse një person vërtetë është autentik, nuk e ka si kriter suprem të jetës a punës të tij suksesin, por përkimin sa më të madh me vullnetin e Zotit dhe tё mirёn e vendlindjes. Kështu mund të pohojmë për ambasadorin Rrok Logu, i cili jetoi e veproi për tё mirёn e pёrbashkёt, pra, pёr Fe e Atdhe në një periudhë të veçantë të ndryshimeve e përparimeve shoqërore e shpirtërore për Shqipërinë.
Ndër arritjet e shumta të shërbimit të tij diplomatik si Ambasador i Shqipërisë pranë Selisë së Shenjtë meritojnë të përmenden veçanërisht marrëveshjet që përgatiti për nënshkrim mes Selisë së Shenjtë dhe Republikës së Shqipërisë në fushën e shëndetësisë, të postave, të arkivave etj.
Jetëshkrimi i shkurtër i Shkëlqesisë së Tij, zotit Rrok Logu, Ambasador i Shqipërisë pranë Selisë së Shenjtë
Ambasadori i ri i Republikës së Shqipërisë pranë Selisë së Shenjtë, Shkëlqesia e Tij, zoti Rrok Logu, lindi më 23 gusht të vitit 1962. Është i martuar dhe ka dy fëmijë. Më 1987 u diplomua në inxhinieri elektrike pranë Universitetit të Tiranës dhe në vijim kreu detyrën e inxhinierit elektronik pranë centralit elektrik të Komanit (1987-1992). Më pas qe kryeinxhinier në ndërmarrjen elektrike në Shkodër (1992-1994), asistent për menaxhimin në Programin ECHO të Karitasit italian në Shqipëri (1994-1998), drejtor i programit të ndërtimit të Karitasit shqiptar (1999-2001); drejtor teknik i Karitasit zviceran për rindërtimin e Spitalit të Lezhës (2002-2004), profesor i inxhinierisë elektrike pranë Politeknikumit të Tiranës (2004-2006). Ka qenë edhe këshilltar i Kryedioqezës së Tiranë-Durrësit për marrëdhëniet me institucionet shtetërore dhe anëtar i Komisionit Shtetëror për Kultet (2004-2006). Ndёrroi jetё mё 1 gusht 2017 nё San Giovanni Rotondo nё Itali.
Nga arkivi i redaksisë shqipe tё Radio Vatikanit ju propozojmё njё bisedën me Ambasadorin Rroku Logu, realizuar menjëherë pas audiencës sё parё tё Papёs Françesku me ambasadorët e 180 Shteteve të akredituar pranë Selisë së Shenjtë, mbajtur nё Vatikan mё 22 mars tё vitit 2013. Me atё rast, Ati i Shenjtë Bergolgio, mes tjerash, u kёrkoi Ambasadorëve tё punojnë pёr përforcimin e dialogut mes feve e tё marrëdhënieve tё Selisё sё Shenjtё me Shtete. Ishte fjalimi parë “gjeopolitik” i Papës Françesku me ambasadorët e Shteteve të akredituara pranë Selisë së Shenjtë, nё tё cilin tregoi linjat udhërrëfyese, ta dëgjojmë Ambasadorin Logu.....
Ju porpozojmë Fjalimin që Shkëlqesia e Tij, zoti Rrok Logu, Ambasador i Shqipërisë pranë Selisë së Shenjtë, mbajti me rastin e paraqitjes së letrave kredenciale Shenjtërisë së Tij, Benediktit XVI në Kastel Gandolfo, mё 29 shtator 2006.
Atë i Shenjtë,
me një ndjenjë të lartë përgjegjësie e nderimi të thellë, jam sot përpara Shenjtërisë Suaj për të dorëzuar letrat kredenciale, me anën e të cilave Presidenti i Republikës së Shqipërisë, Shkëlqesia e Tij, Zoti Alfred Moisiu, me akrediton me cilësinë e Ambasadorit të Jashtëzakonshëm dhe Fuqiplotë pranë Selisë së Shenjtë.
Është përgjegjësi e lartë për mua të përfaqësoj pranë Selisë së Shenjtë vendin tim që, duke ruajtur karakteristikat e veta themelore, priret natyrshëm drejt integrimit me atë pjesë të kontinentit të vjetër, me të cilën e lidh historia e vet e lashtë, pavarësisht nga vuajtjet e gjata që po kjo histori i ka ngarkuar mbi shpatulla Shqipërisë.
Populli shqiptar, jo i madh në numër, trashëgon një nga gjuhët më të vjetra në Europë. Duke kujtuar me dhimbje periudhën pesëshekullore të pushtimit të Shqipërisë nga Perandoria Osmane, periudhë në të cilën lëvrimi i gjuhës sanë ishte i pamundur, sepse ishte shenjë e mbijetesës së kombit, kujtojmë me gëzim edhe faktin se në këtë periudhë historike liturgjia katolike u bë shenjtërorja e ruajtjes dhe e zhvillimit të fjalës shqipe. Fjalët e para të shqipes së shkruar që njohim deri më sot janë: Unë po të pagëzoj në emër të Atit e të Birit e të Shpirtit te Shenjtë. Ky thesar i madh që i la kombit tonë Arqipeshkvi i Durrësit, Imzot Palë Engjëlli rreth 550 vjet me parë, e nderon Kishën Katolike në Shqipëri dhe, duke zhvilluar misionin e saj të shërbimit shpirtëror në këtë gjuhë, kisha do ta meritojë vazhdimisht këtë nderim historik.
Atë i Shenjtë, me kënaqësi mund të shpreh mirënjohjen e thellë të shtetit dhe të shoqërisë shqiptare jo vetëm për historinë e lavdishme të kishës katolike në Shqipëri, por edhe për angazhimin e saj aktual për promovimin e vlerave të larta shpirtërore, për zbutjen e varfërisë si edhe për promovimin dhe zhvillimin e vlerave intelektuale.
Në rrugën e tij të gjatë historike, populli im është përshkuar nga dallgë të mëdha vuajtjesh, që ka shkaktuar egoizmi njerëzor, në kryqëzimet kohore e hapësinore, në të cilat ai është gjendur. Por, më e fortë se fuqia shkatërruese e këtyre dallgëve, ka qenë dashuria e Hyjit për Shqipërinë dhe Shqiptarët, që ka gjetur gjithmonë instrumentat e vet, që sot të kemi Shqipëri. Kanë qenë disa herë paraardhësit Tuaj, Atë i Shenjtë, të cilët kanë luajtur një rol përcaktues për të ardhmen e Shqipërisë, në favor të aspiratave të popullit të saj dhe kjo është një ndër arsyet që populli im ka një nderim të madh për Selinë e Shenjtë dhe për Ju, Shejtëri.
Hyu, dukë zgjedhur ndër shqiptarë gruan që Ju, Atë i Shenjtë, e keni quajtur simbolin e dashurisë njerëzore, na ka dhënë ne shqiptarëve një tjetër shenjë të dukshme se ai nuk na harron ne dashurinë e Tij.
Martirët tanë, e veçanërisht, klerikët katolikë të periudhës së tiranisë komuniste, mbeten një dëshmi e fuqishme e besnikërisë ndaj dashurisë së Zotit, shenjë e dashurisë për të vërtetën dhe e gatishmërisë për t'i shërbyer asaj deri me flijimin e vetvetes, gjë që dëshmon një pasuri shpirtërore të pamohueshme të popullit tonë.
Populli Shqiptar edhe pse jo me shumicë katolike, ka një nderim të madh për Selinë e Shenjtë dhe për Ju, Atë i Shenjtë, sepse ai i lexon, i kupton dhe i nderon vlerat e mëdha që Ju mbroni dhe promovoni në botë. Një shenjë e besimit që ka populli shqiptar në marrëdhëniet me Selinë e Shenjtë ishte edhe votimi i ligjit aplikativ në mbështetje të marrëveshjes për rregullimin e marrëdhënieve të ndërsjellta ndërmjet Republikës së Shqipërisë dhe Selisë së Shenjtë në vitin 2005, që gëzoi mbështetjen e të gjithë deputetëve të pranishëm, pa dallim përkatësie politike apo fetare.
Me miratimin e këtij ligji, që i njeh zotësinë, juridike enteve të Kishës Katolike në Shqipëri, marrëveshja për rregullimin e marrëdhënieve të ndërsjellta bëhet plotësisht e vetëzbatueshme, gjë të cilën po e tregon edhe përvoja e përditshme, e kjo e bën normale situatën juridike të funksionimit të Kishës Katolike.
Duke e konsideruar tani si një përvojë plotësimin e kuadrit ligjor të marrëdhënieve me Kishën Katolike, Shteti Shqiptar po punon intensivisht dhe seriozisht për të kompletuar marrëdhëniet juridike edhe me komunitetet e tjera fetare në Shqipëri. Gjithashtu, qeveria aktuale e Shqipërisë është e angazhuar fuqimisht për zgjidhjen më të shpejtë e përfundimtare të një problemi shumë të rëndësishëm, si për Kishën Katolike, ashtu dhe për komunitetet e tjera fetare tradicionale, Komuniteti Mysliman Shqiptar, Kisha Ortodokse Autoqefale e Shqipërisë, Komuniteti Bektashian i Shqipërisë, që është ai i kthimit dhe kompensimit të pronave të konfiskuara nga regjimi komunist.
Në historinë e tij të gjatë, vendi im, (pa dashjen e shqiptarëve) është bërë pjesë e sistemeve politiko-shoqërore të mëdha, gjë e cila ka lënë gjurmët e veta te dukshme. Sot populli shqiptar, dëshiron të bashkojë sistemin e vet politiko-shoqëror me një sistem të madh, atë të Bashkimit Evropian. Kjo dëshirë nuk shpreh vetëm prirjen për një jetë ekonomike më të mirë, por diçka më shumë e më të rëndësishme, prirjen e natyrshme drejt vlerave te demokracisë evropiane. Sa më të shpejtë të jenë hapat drejt realizimit të kësaj dëshire, aq më i shpejtë do të jetë edhe tejkalimi i dramës së familjeve tona të ndara për shkak të emigracionit dhe aq më energjike, do të jetë shoqëria shqiptare në gjirin e shoqërisë evropiane.
Në këtë aspiratë të madhe historike populli im sheh te Selia e Shenjtë përkrahësin e vet të madh, sepse këtu si askund tjetër flitet e kuptohet sipas gjuhës së dashurisë. Nënë Tereza, bijë e gjakut tonë, ka thënë "... populli shqiptar ka nevojë për shumë dashuri".
I përballur me vështirësitë jo të vogla, që dalin në procesin e reformave të mëdha e të gjithanshme për integrimin në Evropë, vështirësi që vijnë nga mbartje të trashëguara, vendit tim i duhet të përballet dhe me një vështirësi të madhe, atë të efekteve të një imazhi negativ, irreal e të padrejtë, që është përçuar nganjëherë në qarqet ndërkombëtare. Në këto rrethana nuk mund të mos gjejmë mbështetje dhe mirënjohje në thënien tuaj: "Liria e opinionit ndeshet me këtë kufi: ajo nuk mund të shkatërrojë nderin dhe dinjitetin e tjetrit, nuk është liri për të gënjyer e për të fshirë të drejtat njerëzore." [La liberta di opinione trova pero il suo limite in questo:che non puo distruggere l'onore e la dignita dell altro,non e liberta di mentire e di cancellare i diritti umani"(Sensa Radici,fq 70).]
Atë i Shenjtë, populli shqiptar, me një përbërje multifetare, karakterizohet nga një bashkëjetesë shembullore. Këtë cilësi, që vjen si traditë e pandërprerë, ai e ruan si një gjë të çmuar.
Sot, Shqipëria në sajë të politikave rajonale që ndjek, është hërë faktor i rëndësishëm paqeje në rajonin tonë. Shteti Shqiptar është i angazhuar fuqimisht që këtë rol në Ballkan ta çojë edhe më përpara si në marrëdhëniet ndërshtetërore, ashtu dhe në luftën pa kompromis të dukurive të krimit të organizuar e të terrorizmit.
Atë i Shenjtë, duke Ju siguruar se do të vë të gjitha forcat e mia në shërbim të detyrës së lartë që më është ngarkuar, shpreh besimin e plotë se do t'i ndjejmë mbështetjen e lutjeve dhe të ndihmës Suaj, për të mirën e popullit shqiptar.
Duke Ju uruar paqe, jetë e shëndet, për të mirën e njerëzimit mbarë, Ju lutem, Shenjtëri, pranoni letrat kredenciale qe po Ju paraqes dhe nderimet më të thella të Presidentit të Republikës së Shqipërisë.
Rrok LOGU