Kërko

Vatican News
Papa viziton të varfërit gjatë vaksinimit Papa viziton të varfërit gjatë vaksinimit  (ANSA)

Papa ndërmjet të pastrehëve të vaksinuar në Sallën Pali VI

Françesku viziton papritmas qendrën për parandalimin e Covid-19 në Vatikan dhe përshëndet punonjësit e shëndetësisë si dhe njerëzit, që prisnin vaksinën

R. SH. - Vatikan

Vijon, në Vatikan, vaksinimi i të pastrehëve e, sot paradite, e Premtja e Madhe, pak para orës 10.00, Papa Françesku shkoi për vizitë në Sallën Pali VI, ndërsa po vaksinoheshin disa njerëz të pastrehë a në çaste të vështira, të shoqëruar nga anëtarë të shoqatave të ndryshme romake. Papa i përshëndeti mjekët dhe infermierët, ndoqi procedurën e përgatitjes së dozave të vaksinës dhe u ndal për disa minuta me njerëzit, që prisnin të vaksinoheshin. Kujtojmë se deri më sot janë vaksinuar me dozën e parë  rreth 800, nga 1200 nevojtarë. E vaksinimi do të vijojë për të gjithë.

Me ndihmën e Lëmoshtarisë Apostolike, 1200 të vaksinuar deri ditën e Pashkëve

Vaksinimi  i grupit të madh të njerëzve në vështirësi vijon në këtë Javë të Madhe me nismën e Lëmoshtarisë Apostolike, falë dozave të vaksinës Pfizer-Biontech, blerë nga Selia e Shenjtë dhe dhuruar nga Spitali Lazzaro Spallanzani i Romës. Me këtë gjest - saktësohet në një komunikatë të Lëmoshtarisë - konkretizohen thirrjet e vazhdueshme të Papës që askush të mos përjashtohet nga fushata e vaksinimit kundër Covid-19.  Shërbimin mjekësor për vaksinimin po e kryejnë mjekët, punonjësit shëndetësorë dhe vullnetarët e ambulancës “Nëna e Mëshirës”, vendosur nën Kolonatin e Berninit, në Sheshin e Shën Pjetrit, që i ofruan asistencë më se 1200 të varfërve, nga 96 vende, edhe me tamponë e diagnoza.

 Një “vaksinë pezull”…

“Për ta ndarë së bashku mrekullinë e dashurisë për vëllezërit më të ligshtë e për t’u dhënë atyre mundësinë ta gëzojnë këtë të drejtë”, mund të bëhet një donacion on-line për llogari të bamirësisë së Papës Françesku, që drejtohet nga Lëmoshtaria, në kanalin www.elemosineria.va. Është një lloj vaksine “pezull”, për të pohuar  se të gjithë, siç e ka kujtuar më se një herë Papa, “duhet të kenë të drejtë të vaksinohen e askush nuk duhet përjashtuar për shkak të varfërisë”.

Në janar u vaksinuan 25 të pastrehë

Kjo histori filloi që në janarin e kaluar, kur në Vatikan nisi fushtata e vaksinimit. Që atëherë u vaksinuan 25 të pasterhë, që jetojnë rreth Sheshit të Shën Pjetrit e që  mikpriten në strukturat e Lëmoshtarisë, të pranishme në zonë. Burra e gra mbi 60 vjeç, me probleme të rënda fizike e vështirësi edhe më të mëdha për t’u pranuar në  strukturat shëndetësore kombëtare. Është kjo një ndihmë, që i shtohet angazhimit të cilin, që në fillim të emergjencës shëndetësore, Papa e ka dëshmuar konkretisht duke dhuruar, përmes lëmoshtarisë, makineri për spitalet e Italisë e të botës, e duke u krijuar njerëzve, për të cilët nuk mendon askush, mundësinë e përdorimit të tamponeve.

 

02 prill 2021, 14:04