Cascia u jep çmim tri grave, që kanë imituar virtytet e Shën Ritës
R.SH. - Vatikan
Që nga viti 1988, në Cascia të Italisë, tregohen histori faljeje e dashurie, histori grash të dalluara në imitimin e virtyteve të Shën Ritës, gra, që e kanë konsideruar mision jetësor impenjimin në mbrojtje të dinjitetit, të të drejtave dhe të detyrave të njeriut. Në prag të kujtimit liturgjik të shenjtes së rasteve të pamundura, Kuvendi i murgeshave augustiniane dhe bashkia e qytetit të Umbrias u japin atyre Çmimin Ndërkombëtar të Shën Ritës, që synon përhapjen e mesazhit të paqes, drejtësisë e solidaritetit në botë.
Deri më sot, të ashtuquajturat “gratë e Ritës” janë 119. Ashtu si shën Rita, ato kanë ditur të falin, të vuajnë e të duan me gjithë shpirt, ua kanë hapur zemrën të tjerëve, me gjeste konkrete solidariteti dhe bamirësie; gra të të gjitha moshave, kushteve, kombeve, feve, vlerat e të cilave janë të njëjta me ato të jetës së Shën Ritës. Këtë vit, Çmimi u jepet Gina Garrisi-t, Annalori Gorla-s dhe Monika Kornecka-s, të cilat do të lënë në Cascia një trëndafil të mbjellë në kopshtin e trëndafilave të qytetit, si simbol i aromës së virtyteve të tyre. Çmimi u jepet pasdite, në fund të meshës së kremtuar në Bazilikën e Shën Ritës, nga Eprori i Përgjithshëm i Urdhrit të Shën Augustinit, atë Alejandro Moral Antón.
Gratë e Ritës
Geltrude Garrisi – që zakonisht e quajnë Xhina - është nga Caltabellotta, në Sicili. Ajo e pranoi me dashuri sëmundjen e vajzës së saj të madhe, duke u kujdesur për të me përkushtim dhe fe. Njëkohësisht, u shërbeu edhe të sëmurëve e të vuajturve të tjerë, duke kultivuar devocionin e saj për Shën Ritën e duke promovuar, së bashku me gra të tjera, Bashkimin Primar të përshpirtshëm të Shën Ritës në Caltabellotta. Anna Lorenza Gorla, nga Milano, - për të gjithë Annalori - është e veja e Giorgio Ambrosoli-t, i cili, pasi u emërua komisar likuidues i Bankës Private Italiane, u vra më 11 korrik 1979, pa iu nënshtruar kërcënimeve dhe presioneve për të fshehur parregullsitë dhe komplotet e paligjshme. Në motivacionin e çmimit, lexohet se “ajo e ktheu përvojën e saj të dhimbshme personale dhe familjare në impenjimin aktiv për të mirën e përbashkët”. Që prej vitesh, Annalori Gorla promovon vlerat e drejtësisë dhe të barazisë shoqërore, duke ua transmetuar trashëgiminë morale të të shoqit, fëmijëve të saj dhe të rinjve, që takon në veprimtarinë e palodhur shoqërore.
Së fundi, Monika Kornecka, polake nga Krakovi, vlerësohet me Çmimin Ndërkombëtar të Shën Ritës, sepse e fali vrasësin e të birit, duke e ndalur klimën e urrejtjes dhe hakmarrjes, krijuar rreth familjes së vet. Davidi, 23 vjeçar, u vra nga një i dehur, në përpjekjen për të mbrojtur të fejuarën dhe një shoqen e saj nga ngacmimet e burrit. Me forcën e fesë, Monika arriti të falë atë, që e la pa të birin dhe të fillojë një jetë të re, duke ia kushtuar atë të tjerëve; e la punën si llogaritare dhe vendosi ta kalojë jetën e saj me fëmijët e sëmurë dhe të vuajtur. Sot, u kushtohet edhe të sëmurëve me Covid-19, vazhdon të lutet për vrasësin e djalit, të cilit i ka shkruar në burg, duke i siguruar faljen e saj.
Çmim, që i bën të dukshme dëshmitë e dashurisë
Çmimi Ndërkombëtar i Shën Ritës nxjerr në dritë histori të përditshme, dëshmi të dashurisë, vuajtjes dhe dhimbjes, që kujtojnë episodet e jetës së Rita Lotti-t, asaj gruaje të përvujtë, që jetoi ndërmjet shekujve XIV dhe XV, sot, shenjtja e rasteve më të vështira, për të cilat i kërkojnë ndërmjetësim mijëra besimtarë.