Dita e dialogut me hebrenjtë: “Jemi shpirtërisht semitë”
R. SH. - Vatikan
Sipas vëzhguesit të Qendrës së Dokumentimit Hebraik bashkëkohor, aktet e antisemitizmit kryer në Itali gjatë tremujorit të parë të vitit 2020, janë 79, me prirje për t’u thelluar akoma më shumë, në krahasim me dyvjeçarin e mëparshëm. “Duhet ta pyesim veten sa janë përvetësuar mësimet e Koncilit në bashkësitë tona”, nënvizon imzot Ambrogio Preafico, kryetar i Komisionit ipeshkvnor italian për ekumenizmin dhe dialogun, në Materialin ndihmës të paraqitjes së Ditës XXXII për thellimin e dialogut ndërmjet katolikëve dhe hebrenjve, që do të kremtohet nesër. “Ky proces mirëkuptimi e dialogu - nënvizon ipeshkvi i Frosinone-Veroli-Ferentino - ka akoma nevojë të përvetësohet e të bëhet kulturë, domethënë, mënyrë e të menduarit, të folurit e të shkruarit, me një fjalë, mënyrë të jetuarit”.
“Mendoj - kujton imzot Ambrogio Preafico - se vitet e fundit janë bërë shumë hapa përpara në dialog. Përveçse me Bashkësinë hebraike italiane, me rabinët Toaff e Di Segni, janë krijuar marrëdhënie shumë të bukura edhe me kryerabinët e tjerë, e jo vetëm me ata evropianë, por edhe me rabinët amerikanë e, posaçërisht, me rabinët e Izraelit. E kjo na ndihmon ta kuptojmë më mirë njëri-tjetrin. Besoj se edhe ata e kanë kuptuar më mirë punën, që po bën Kisha katolike për t’i thelluar marrëdhëniet me hebraizmin, domethënë me rrënjët e fesë sonë, që janë pikërisht rrënjë hebraike!”.