Kërko

Vatican News
Manifestim në Kosovë Manifestim në Kosovë  (AFP or licensors)

Kosova dhe Izraeli lidhin marrëdhënie diplomatike

Kosova, që pas dy javësh do të shkojë drejt kutive të votimit për zgjedhjet e parakohshme parlamentare, nga data 1 shkurt nis marrëdhëniet diplomatike me Izraelin. Ngjarje me rëndësi për gjithë zonën ballkanike.

R. SH. - Vatikan

Do të jetë një ceremoni zyrtare virtuale, ajo e së hënes, me të cilën do të nisin marrëdhëniet diplomatike ndërmjet dy vendeve. Do të marrin pjesë ministrja kosovare e punëve të jashtme, Meliza Haradinaj-Stublla dhe homologu i saj izraelit, Gabriel Ashkenazi. Lajmin e dha vetë Stublla, duke e quajtur ngjarjen “çast historik”.

E kështu është si për Kosovën, ashtu edhe për gjithë zonën ballkanike e jo vetëm - pohon në Vatican News Mauro Ungaro, drejtor i 'Voce isontina', e përjavshme e dioqezës së Gorizias: “Shtatorin e kaluar ish-presidenti i SHBA-ve, Trump pati njoftuar se Serbia e Kosova do t’i normalizonin marrëdhëniet me Izraelin. Marrëveshje - vijon - e cila parashikon, ndërmjet tjerash, zhvendosjen e ambasadës së Beogradit nga Tel Avivi, në Jeruzalem. Por edhe njohjen e Kosovës nga Izraeli, me angazhimin e Prishtinës për ta hapur edhe ajo ambasadën në Jeruzalem, duke u bërë vendi i parë me shumicë myslimane që e pranon këtë.

Kosova drejt kutive të votimit

Ndërkaq, në këndvështrimin politik, Kosova do të  shkojë tek kutitë e votimit më 14 shkurtin e ardhshëm, për zgjedhjet parlamentare të parakohshme pasi, sipas Gjykatës Kushtetuese, qeveria e kryeministrit Avdullah Hoti është e paligjshme, sepse e mbështetur nga një deputet i dënuar përfundimisht për mashtrime. Zgjedhjet - sipas Ungaros - bëhen në në një çast të veçanë, me shumë sfida por edhe me shpresë për një të ardhme më të mirë për  qytetarët e për një stabilitet shqoëror  e përforcim të sistemit demokratik.

Dialogu me Serbinë

Përsa i takon dialogut të Kosovës me Serbinë, për drejtorin e 'Voce isontina' ka shumë shpresa, bazuar mbi faktin se, në këtë çast, presidenti serb Vuçiç ka me vete shumicën parlamentare, gjë që mund t’i çojë Beogradin e Prishtinën drejt nënshkrimit të dëshiruar nga shumëkush. “Si Bashkimi Evropian, ashtu edhe SHBA-të - përfundon Ungaro - e dëshirojnë këtë, sepse do të ndikonte  për  paqëtimin e gjithë zonës ballkanike”.

31 janar 2021, 14:15