ትኽስታ ላንጋ ላንጋነትን ሸለልትነትን ኣይጥልፈኩም! ር.ሊ.ጳ ንሓደስቲ ካርዲናላት

“ናይ ዘመነ ምጽኣትን ምጅማር ዓመት ሊጡርግያን ቀዳማይ መልእኽትኸስ እግዚአብሔር ቀረባና ምሳና ኣብ መንጎና ምዃኑ ዳግም ብምርግጋጽ ብዝበለጸ ቅረበና ደኣ ገና እናበልና እንልምነሉ ግዜ እዩ። ንሱ ወትሩ ኣብ ቀረባና ክኸውን ክቀርበና ይደሊ! ነዚ ከኣ ብሓይሊ ኣይኮነን ዝገብሮ እዚ ይሕሸኩም ኢሉ ከም ሓሳብ የቅርበልና ስለዚ ኦ ጐይታ ንዓ ቅረበና ማራን ኣታ ወሪ ቀልጢፍካ ንዓ ክንብሎ ንዓና ይምልከት። ዘመነ ምጽኣት ዘዘኻኽረና ጉዳይ እንተሃልዩ ብቀዳምነት ኢየሱስ ድሮ መጺኡ ኣብ ማእከልና ከምዘሎ ስዒቡ ከኣ ኣብ መወዳእታ ዓለም ክምለስ ምዃኑ እዩ። እንተኾነ እዘን ዝቀደማን ገና ብድሕሪ ሕጂ ክፍጸም ዘለዎን ምጽኣታት ሎሚ ኣብ ሕይወትና ዘይመጽእ እንተዀይኑ እንታይ ክዓብሳልና እየን! እወ ብርግጽ ሳልሳይ ዓይነት ምጽኣት እውን ኣሎ። ዕለት ዕለት ይመጽእ እዩ እንተኾነ ከይዓደምካዮ ኣብ ልብኻ ኣይኣቱን። ስለዚ ንዓድሞ ምዕዳም ጥራይ ዘይኮነ ከኣ ንሱ ብጥቃና ክሓልፍ እንከሎ ንሱ ኣብ ጐድንና ክንቀሳቀስ እንከሎ ምስትውዓል የድሊ ከመይ እንተዘይኣተውዒልና ከይረኣናዮን ከይሰማዕናዮን ኮታ ከየስተውዓልናሉ ክሓልፍ ይኽእል።”

“ምስ ጐይታ እንኾነላ ዕለት ክትመጽእ እያ። እወ ብርግጽ ክትመጽእ ኣዘንጊዓ ከይትረኽበና ንንቃሕ! ጸልማት ለይቲ ክሓልፍ እዩ ጐይታ ከም ጸሓይ ብራቅ ክቅልቀል እዩ። እቲ ኣብ ዕጸ መስቀል ምእንታና ዝሞተ ክፈርደና እዩ። ነዚ ነቂሕና ንጸበ። ብተስፋ ቊርጸት ከይንሽነፍ ሓደራ። ብተስፋ ንንበር። ከምቲ ቅድሚ ምውላድና በቶም ዘፍቅሩና ብዓቢ ህንጡይነት ትጽቢት ዝተገብረና ሕጂ ከኣ በቲ ፍቅሪ ባዕሉ ካብ ዝኾነ ጐይታ ትጽቢት ይግበረልና። ኣብ መንግሥተ ሰማያት ክንድዚ ትጽቢት ካብ ተገብረልናኸስ ከመይ ኢልና ኢና ብጉዳይ መሬት እናስተማሰልና ንነብር! ስለምንታይከ ስለ ቁሩብ ገንዘብ ስለ ክብሪ ስለ ምድራዊ ዓወት ንሻቀል! ኩሉ እኮ ሓላፊ በናኒ በራሲ እዩ። በርሃው ዝበለ ብርሃን መዓልቲ እናተጸበየናስ ከመይ ቢልና ኢና ብጸልማት ለይቲ ነጉረምርም! ዝለዓለ ሽመት ኣብ ሰማይ እናተጸበየናስ ከመይ ቢልና ኢና በናኒ ሽመት ንክንረክብ ጐይቶት ዓለም ሃሰስ እንብል! ኩሉ ሓላፊ እዩ። ጐይታ ንቅሑ ይብለና ኣሎ ኢሎም።”

“ጐይታ ነቲ በዂሪ ፍቅርና ዝኾነ ፈጣሪ ረሲዕና ብሃሰሰ ለባም ኣብ እንጐዓዘሉን ንሻቅሎት ናብራና ጥራይ ኣብ እነተኩረሉን ግዜ ክመጽእ እዩ። እንተኾነ ብዘይ ሓይሊ ፍቅሪ እግዚአብሔርን ትጽቢት ምሕዳስ መንፈስን እንተጸኒሕና ላንጋ ላንጋ ኣይምውቅ ኣይዝሑል ዓለማዊ ኰና ንርከብ። እዚ ጠባይ እዚ ከኣ ንእምነትና የቅህም ከመይ እምነት ተጻይ ላንጋ ላንጋነት እዩ። እምነትሲ ሃልሃል ዝብል ሃረርታ እግዚአብሔር ኰይኑ ወትሩ ከሐድሰናን ክልወጠናን ዝነብር ጽንዓት ፍቅሪ ኰይኑ ወትሩ ንቅድሚ ከም እንስጉም ይገብረና። ንእምነት ንምብርባር ከምቲ ጐይታ ዝብሎ ወትሩ ምጽላይ የድሊ።”

“ጸሎትከስ እግዚአብሔር ኣብ ጥቃና ንክኸውን የፍቅድ በዚ ከኣ ካብ ብሕትውና ኣላቂቁ ተስፋ የስንቀና። ጸሎት እስትንፋስ ሕይወት እዩ። ከየስተንፈስካ ክንበር ከምዘይከኣል ብዘይ ጸሎት ክርስትያን ክኽወን ኣይከኣልን። ንገዛእ ርእስና ጥራይ ዘይኮነ ስለ እቶም ዝታኸሱን ዝድቅሱን ብዙሕ ጸሎት ምግባ የድሊ። ስለዚ ከኣ ኢና ብዙሓት ኣማለድቲ ለይትን መዓልትን ብስግደትን ብእምልኾን ኣብ ቅድሚ እቲ ብርሃን እታ ጸልማት ታሪኽ ዝኾነት ዓለም ዝኾነ ኢየሱስ ክርስቶስ ነቂሖም ብትግሃት ዝጽልዩ ክርስትያን የድልዩና።”

“ብዛዕባ ገዛእ ርእስናን ግድነትናን ናይ ምሽቃል ልማድ ምስ ኣሕደርና ብዛዕባ ካልኦት ሸለል ንብል በዚ ከኣ ንልብና ለይቲ ይወሮ። ልብና ጸልማት ይኸውን። ብኡ ንብኡ ከኣ ብዛዕባ ኩሉ ዕሚም እናበልካ ምጉርምራም ስዒቡ ኩሉ ጸላኢኻ ኰይኑ ይስመዓካ ኣብ መወዳእታ ንኩሉ ነገር ትቋወም። ዕሚም እናበልካ ምጉርምራም ግዳይ ናይ ካልኦት ኢልካ ምሕሳብ ኣብ መወዳእታ ንኩሉ ምቅዋም ይስዕብ። እዚ ተደጋጋሚ ሰንሰለት እዩ። ኣብዚ ዘሎና ግዜ እዛ ጸልማት ለይቲ እዚኣ ንብዙሓት ዝጐልበበት ዘንጸላለወት ትመስል። እዚኦም ከኣ ብዛዕባ ገዛእ ርእሶም እምበር ብዛዕባ ካልኦት ዘይግደሱ እዮም። ስለዚ ድሕሪ ኣብ ጸሎት ምትጋህ ኣብ ግብረሠናይ ምትጋህ ከምዘድሊ ኣይንዘንግዕ ኢሎም።”

“ንገሊኦም ርሕራሔ ምዝውታር ንካልኦት ምሕጋስ ምግልጋል ናይ ዝኸሰሩ ጉዳይ ኰይኑ ዝረኣዩ]ዮ ኣይሰኣንን። ከም ሓቁ ግን ኣብዛ ዓለምና እታ እንኮ መንገዲ ዓወት እዚኣ እያ ከመይ ናብ መጻኢ ዝዓለመት ዕለት ጐይታ ምስ በጽሐ ከኣ ኩሉ ኪሓልፍ ምዃኑ ፍቅሪ ግን ንዘለዓለም ክትነብር ስለዝኾነ እዩ። ብናይ ምሕረት ሥራሓት ጥራሕ ኢና ናብ ጐይታ ክንቀርብ እንኽእል ኢሎም።”

“[ ቤተክርስትያን ንእግዚአብሔር ኣምልኾ እተቅርብን ንብጻይ እተገልግልን ቤተክርስትያን ኣብ ጸልማት ለይቲ ከቶ ኣይትነብርን። ኦ ጐይታ ኢየሱስ ንዓ ሃረርታ ጸሎትን ኣድላይነት ፍቅርን ከምዝስመዓና ግበር። ] ”