ብዓወት ሰኺርካ ንዝግበር ብደዔ ሱቚታ ኢየሱስ ስዒርዎ! ር.ሊ.ጳ

አባ መኰንን አማኑኤል - ከተማ ቫቲካን

ቅዱስነቶም ድሕሪ ዑደተ ሆሳዕና ድሕሪ ንባበ ወንጌል ‘ጐይታና ኢየሱስ ክርስቶስ ብትሕትናኡ መንገዲ እምነት ከፊቱልና` እንብሉ ነቲ ኣብ ዕለቱ ዝተነበ ናይ ሉቃስ ወንጌላዊ ዜና በዓለ ሆሳዕናን እቲ ወትሩ ዝዝመር ‘ቡሩኽ ዘይመጽእ በስመ እግዚአብሔር እቲ ብስም እግዚአብሔር ዝመጽእ ዝተባረኸ እዩ’ ብሓባር ምስ ሕዝቢ ሆሳዕና በኣርያም እናበሉ ዘሚሮም።

ቅዱስነቶም በዓለ ሆሳዕና ክልተ ገጽታ ከምዘለዎ እዚ ከኣ በቲ ሓደ ወገን ናይ ጐይታና ኢየሱስ ክርስቶስ ብክብሪ ናብ ከተማ ኢየሩሳሌም ምእታው ናይቶም ሕዝቢ ብዓቢ ሓጐስ ምቅባል ከምኡ እውን ዝስዕቦ ውርደት ሶሙነ ሕማማትን ናይቲ ብዓቢ ሓጐስ ዝቅበልን ዝዝምርን ዝነበረ ሕዝቢ ብጐስጓስ ሊቃነ ካህናትን መራሕትን ናብ ጽልእን ስቀሎ ስቀሎን ምልዋጥን ምዃኑ ገሊጾም። ነዚ ንምዝካር ከኣ እያ ላቲናዊ ሥርዓተ ኣምልኾ እትኽተል ካቶሊካዊት ቤተክርስትያን መጀመርያ ሥርዓተ ሆሳዕና ብምፍጻም ጨናፍር ኣውሊዕን ሆሳዕናን ብምሓዝ ዑደትን መዝሙርን ድሕሪ ምብጻሕ ብጸጥታ ምሉእ ሕማማት ኢየሱስ ብምንባብ ትዛዝሞ። ንሎምዘመን ዝቀረበ ቅዱስ ሉቃስ ዘቅርቦ እዩ። ሱቊታን ትሕትናን ኢየሱስ ዝምህረና በብሓደ ንምዝርዛር ከስ በታ ብምሉእ ምትእምማን ንኩሉ ኣብ ኢድ እግዚኣአብሔር ኣቦኡ ምሕዳጉ ይጅምሩ።

ብተኣማንነት ንኩሉ ኣብ ኢድ እግዚኣአብሔር ኣቦ ምሕዳግ!

ከም ሓበሬታ ቅድስት መንበር ኣብ ቅዳሴ ዝተሳተፉ ምእመናን ከባቢ 40 ሺሕ ኰይኖም ኣብ ግዜ ጸሎተ መልአከ እግዚአብሔር ኣብ ፍርቂ መዓልቲ ልዕሊ ሓምሳ ሺሕ ከምዝበጽሑ እንክግለጽ ቅዱስነቶም ኣብነት ኢየሱስ ተኸቲልና ብመንፈስ ቅዱስ ክንምራሕን ነቲ ኣብ ጸሎት እንልምኖ ጸጋታት ንምቅባል ከኣ ኣብዚ ቅዱስ ሶሙነ ሕማማት ንጐይታና ብጸሎት ክነሰንዮ ንዝተረፈ መዋዕል ሕይወትና ከኣ ነቲ ዓቢ ትምህርቲ ናይ ሕማማቱ ኣብ ቅድሜና እንተገርና ተጻይ እቲ ክፉእ መንፈስ ዓወት ክንጐናጸፍ ኢና ኢሎም።

መንፈስ ዓለማውነት ስግኣት ቤተክርስትያን!

ጐይታና ኢየሱስ ክርስቶስ ኣብ ኢየሩሳሌም ኪኣቱ እንከሎ ከም ኩሉ ብዓወት ዚኣቱ ተቅባል ዚግበረሉ ኪዕበ ኣይበልናንዶ ክብል ክጀሃር ይኽእል ነሩ ኮይኑ መንገዲ ትሕትና ይመርጽ ከመይ ብዓወት ሰኺርካ ሆ ሆ ምባል ናይ መስፍን ናይዚ ዓለምዚ መንገዲ እዩ።

ብጉዳይ መስቀል ዋጋ ዕዳጋ የለን!

ቅዱስነቶም ናብ ልቢ ኢየሱስ ይዕድሙ እሞ ‘ልቢ ኢየሱስ እቶም ድኻታት እስራኤል ክሕጐሱን በዓል ክገብሩን እቶም ስሙ እናጸውዑ ንጉሥን መሲሕን ምዃኑ ዝጭርሑ ዝነበሩ መንእሰያት እዩ ዘተኲር ዝነበረ። ትሕትና እንክብል ነቲ ኩነት ምኽሓድ ማለት ኣይኮነን። ኢየሱስ ብሓቂ መሲሕ ብሓቂ ከኣ ንጉሥ እዩ። ኰይኑ ግን ኣብ ልቡ ዘዕገርግር ዝነበረ ካልእ መንገዲ ነሩ። እታ ቅድስቲ መንገዲ እታ ዝሳቀ ባርያ እግዚአብሔር እትብል! እቲ ከሕልፎ ዘለዎ ውርደት! እቲ ክሳብ ሞት ሞት ብሞቱ ከኣ ኣብ ዕጸ መስቀል እዩ ኣብ ልቡ ዝመላለስ ዝነበረ።

ናብ ወጋሕታ ትንሣኤ ገጽካ ምጒዓዝ!

ናብ ትንሣኤ ክንበጽሕ እንተዀና እታ ቀዳመይቲ ዕዮ ገዛና ነዛ መንገዲ እምነት እዚኣ ኣብ ኣሰሩ ክንስዕባ ኣሎና። ኣብዚ እታ ቀዳመይቲ ሓዋርያን ዓወት ዝተጐናጸፈትን ድንግል ማርያም እያ።

መንገዲ ትሕትና !

እኖና ድንግል ማርያም ኣብ እግሪ መስቀል ኢየሱስ ኰይና እንታይ ትሕስብ ነራ እንተበልና ነቲ ገብርኤል መልኣኽ ኣብ ዕለተ ብሥራት ‘መንግሥቱ መወዳእታ የብሉን’ ንዝብልዶ ይኸውን ወይውን እቲ እትፈትዎ ወዳ ከም ሓደ ገባር ክፉእ ኣብ ዕጸ መስቀል ክግዕር እንከሎ ደኾን ደኾን ብማለት ዋእ እቲ ተስፋ ደኣ እንታይ ኰይኑ ዶ ኢላ ትኸውን።

ዓለምለኸ ዕለተ መንእሰያት!

ቅዱስነቶም ኣብ ዕለቱ ብዓለ ሆሳዕና ጥራይ ዘይኮነ ዓለምለኸ ዕለተ መንእሰያት እውን ብደረጃ ሰበኻታት እውን ስለዝዝከር ነቶም ኣብ ቅርዓት ቅዱስ ጴጥሮስ ዝነበሩ መንእሰያት ‘ካባና ብዙሕ ዘይረሓቁ ጐረባብትና ክንብሎም እንኽእል እግዚኣአብሔር ጥራይ ዝፈልጦም ብዙሓት ቅዱሳንን ቅዱሳትን መንእሰያት ኣለው። ፍቃዱ ኣብ ዝኾነሉ ከኣ ይገልጸልና እውን ኢሎም።

ሱቚታ ኢየሱስ!

ቅዱስነቶም ኣብተን መእተዊ ስብከቶም ዝበልወን ክልተ ተጻረርቲ መግለጺታት በቲ ሓደ ወገን ኣብ ዕለተ ሆሳዕና ብዓቢ ታሕጓስን ሆሆታን ምቅባል ኢየሱስ በቲ ሓደ ወገን ከኣ ስቀሎ ስቀሎ እናበልካ ምጭራሕ ናይቲ ሕዝቢ ይጠቅሱ እሞ ካብዚ ኩሉ ግን እታ ጐይታና ኢየሱስ ክርስቶስ ኣብ ግዜ ሕማማት ዘርኣያ ሱቚታ ተስደምም ከመይ በቲ ሆሆታ ኣብ ብድዔ ንከይትወድቅ ወይውን በቲ ምንጻግ ንከይትደሃል ትሕግዝ። ሱቊታ ተሸንፍ።

ምኽንያት ተስፋና!

ኣብ ከምዚ ዝበለ ናይ ፈተናን ውግእን ዕግርግር ጐይታ ባዕሉ መጺኡ ነቲ ማዕበል ከህድኦ ክንጽበ የድሊ። እዚ እናኾነ ክንገብሮ ዘሎና ብሱቊታ ምስክርነት ጸሎት ምቅራብ እዩ። በዚ ከኣ ነታ ኣብ ውሽጥና ዘላ ምኽንያት ተስፋና ንረኽባ እሞ ኣብ ውሽጢ ቅድስት ወጥሪ ዝኽሪ ተስፋን ናይታ ዘሎና ዋጭዋጭ ናይ መስቀልን ተስፋ ትንሣኤን ንኸውን። እንክብሉ ስብከቶም ዛዘሙ።