மனம், மற்றும் இதயத்திற்கு வாழ்வை வழங்கும் தூய ஆவியார்

கிறிஸ்டோபர் பிரான்சிஸ் – வத்திக்கான் செய்திகள்

ஆற்றலோடு, சுதந்திரமாக வீசும் காற்றைப்போன்று விளங்கும் தூய ஆவியாரின் செயல்பாடுகள் குறித்து, ஆழமாகச் சிந்தித்து, அவரின் கொடைக்கு நம் இதயங்களைத் திறந்து, இறையன்பிற்கு சான்று பகர்பவர்களாக வெளியில் செல்ல தூய ஆவியார் நமக்கு அழைப்புவிடுக்கிறார் என்று திருத்தந்தை பிரான்சிஸ் அவர்கள் கூறினார்.

வத்திக்கான் புனித பேதுரு பெருங்கோவில் வளாகத்தில், மே 23, இஞ்ஞாயிறு நண்பகல், வானக அரசியே வாழ்த்தொலி உரைக்காக காத்திருந்த மக்களை நோக்கி, திருத்தந்தை பிரான்சிஸ் அவர்கள், இயேசுவின் பாஸ்கா விழாவுக்கு 50 நாட்களுக்குப்பின் எருசலேமில் நடந்ததை விவரிக்கும் திருத்தூதர் பணிகள் நூல் பகுதி குறித்து எடுத்துரைத்தார். 

மேலறையில், அன்னை மரியாவுடன் தங்கியிருந்த சீடர்களுக்குத் தோன்றிய இயேசு, தூய ஆவியார் வரும்வரை அங்கேயே தங்கியிருக்குமாறு எடுத்துரைத்ததை நினைவூட்டினார்.

திடீரென்று கொடுங்காற்று வீசுவது போன்று ஓர் இரைச்சல் வானத்திலிருந்து உண்டாகி, அவர்கள் அமர்ந்திருந்த வீடு முழுவதும் ஒலித்தது, என தூய ஆவியாரின் வருகை குறித்து திருத்தூதர் பணிகள் நூல் விவரிப்பது, தூயஆவியார் ஆற்றலுடையவர், சுதந்திரமானவர் என்பதை மட்டுமல்ல, அவர் கட்டுப்படுத்த முடியாதவர், நிறுத்தப்பட முடியாதவர், அளவிடப்பட முடியாதவர், மற்றும் அவர் செல்லும் திசையை நாம் முதலிலேயே அறியமுடியாது, என மேலும் எடுத்துரைத்தார் திருத்தந்தை பிரான்சிஸ்.

வாழ்வை வழங்கும் ஆண்டவர் என தூய ஆவியாரை விவரிக்கும் நம் விசுவாச அறிக்கையைப்பற்றி எடுத்துரைத்த திருத்தந்தை பிரான்சிஸ் அவர்கள், இறைத்தந்தை, மற்றும் மகனிலிருந்து புறப்பட்டு வரும் தூய ஆவியார், நம் ஒவ்வொருவரின் மனம் மற்றும் இதயத்திற்கு வாழ்வை வழங்குகிறார் என்றார்.

பெந்தகோஸ்து நாளின்போதும், திகைத்துப்போய், என்ன செய்வது என அறியாமல் அச்சம் கொண்டிருந்த சீடர்களைப்போல், நாமும் பலவேளைகளில் நமக்கென பாதுகாப்புச் சுவர்களை உருவாக்கி அதற்குள் முடங்க நினைக்கும் வேளைகளில், இறைவன் நம் இதயக் கதவுகளைத் திறந்து, தூய ஆவியாரை அனுப்பி, நம்மை புதிய படைப்பாக்குகிறார் என மேலும் கூறினார் திருத்தந்தை பிரான்சிஸ்.

அனைத்து மக்களையும் ஒருவருக்கொருவர் உரையாட வைப்பதன் வழியாக தூய ஆவியார் திருஅவைக்குள் ஒன்றிப்பைக் கொணர்கிறார் என உரைத்த திருத்தந்தை, நாம் இவ்வுலகில், புளிக்காரமாகவும், உப்பாகவும் ஒளியாகவும் செயல்படுவதற்குரிய வரத்தை தூய ஆவியார் வழங்குகிறார் என்று கூறினார்.