Çmimi Ratzinger teologut O'Regan dhe skulptorit Sotoo

R.SH. / Vatikan

Janë teologu Cyril O'Regan dhe skulptori Etsurō Sotoo ata që do të marrin çmimin Ratzinger 2024, më 22 nëntor, në orën 17:00, nga Sekretari i Shtetit të Vatikanit, Pietro Parolin, në Sala Regia në Pallatin Apostolik, në Vatikan. Paraditën e 22 nëntorit të ardhshëm, në orën 7.15, në kripten e Bazilikës së Vatikanit do të kremtohet Mesha në përkujtim të Papës Benediktit XVI, te varri i tij. Më pas O'Regan dhe Sotoo do të priten në audiencë nga Papa Françesku.

Cyril O'Regan

Profesori O'Regan, irlandez, i lindur më 1952, është profesor i Teologjisë Sistematike në Departamentin e Teologjisë pranë Universitetit Notre Dame në Indiana, në Shtetet e Bashkuara të Amerikës, ka studiuar filozofi në Irlandë dhe më pas ka kryer doktoraturën në Filozofi dhe Teologji në Universitetin Yale. , ku edhe ka dhënë mësim. Fushat kryesore të studimit të tij janë Teologjia Sistematike dhe Historia e Krishterimit. Autor i shumë artikujve dhe i disa veprave, duke përfshirë The Heterodox Hegel, Gnostic Return in Modernity, Theology and the Spaces of Apocaliptic, Anatomy of Misremembering: Balthasar’s Response to Philosphical Modernity, e Newman and Ratzinger që do të publikohet së shpejti, ai kryen një veprimtari mësimore intensive, është shumë i vlerësuar nga studentët dhe i ka kushtuar disa artikuj të rëndësishëm figurës dhe mësimdhënies së Joseph Ratzinger-Benediktit XVI.

Etsurō Sotoo

Sotoo, japonez, i lindur në Fukuoka 1953, ka diplomuar në Artet e Bukura në Universitetin e Kiotos, ku ishte edhe profesor. Ka dhënë mësim edhe në Osaka. Në vitin 1978, duke vizituar Barcelonën, i impresionuar nga ndërtimi i Bazilikës së "Sagrada Familia", kërkoi të punonte atje si skulptor, duke filluar nga Fasada e Lindjes së Krishtit, duke ndjekur udhëzimet e lëna nga Antoni Gaudí. U konvertua në krishterim dhe pagëzua. Ai është një ndër të devotshmit e zjarrtë të Gaudí, i përkushtuar gjithashtu edhe ndaj kauzës së tij të kanonizimit. Veprat e tij kryesore janë në pjesë të ndryshme në tempullin "Sagrada Familia" – e cila ndër të tjera është bekuar dhe përkushtuar pikërisht nga Benedikti XVI gjatë udhëtimit papnor në Barcelonë në vitin 2010 - por veprat janë edhe në vende të ndryhsme në Spanjë, Japoni dhe Itali, ku Sotoo në vitin 2015 krijoi ambon të Katedrales së Firences, në Santa Maria del Fiore. Etsurō Sotoo është i pari aziatik lindor dhe skulptori i parë që është vlerësuar me çmimin Ratzinger.