Imzot Gallagher në Mal të Zi, takim me autoritetet e me bashkësinë katolike

R.SH. – Vatikan

Do të fillojë nesër, 21 mars, për të vijuar deri të dielën, 24 mars, udhëtimi i Sekretarit vatikanas për Marrëdhëniet me Shtetet dhe me Organizatat ndërkombëtare, imzot Paul Richard Gallagher, në Malin e Zi. Sipas programit të njoftuar nga Sekretaria e Shtetit të Vatikanit, parashikohet një takim me presidentin e Republikës, Jakov Milatoviq, të premten më 22 mars, pasuar nga ai me kreun e Parlamentit, Andrija Mandiq, si edhe me kryeministrin Milojko Spajiq.

Po të premten, imzot Gallagher do të marrë pjesë në hapjen e Sesionit të Komisionit të përzier për zbatimin e Marrëveshjes Bazë ndërmjet Selisë së Shenjtë dhe Malit të Zi. Të shtunën, më 23 mars, ai do të takohet me bashkësinë katolike të dioqezës së Kotorrit, me të cilën prelati do të kremtojë Eukaristinë, në katedralen e Shën Trifonit. Të dielën, 24 mars, dita e fundit e vizitës së tij, imzot Gallagher do të takohet me bashkësinë katolike të kryedioqezës së Tivarit dhe do të kremtojë meshën në konkatedralen e Shën Pjetrit.