Kard. Semeraro: Shën Toma i Akuinit, ose "kundrimi i studimit"
R.SH. / Vatican News
E patën quajtur, ndërmjet dashurisë dhe ironisë, "kau i Siçilisë" për pamjen e njeriut që, me sa duket, pëlqente më shumë heshtjen, sesa biseden, e mendjen e kishte kushedi se ku. Si i ri, një nga mësuesit e kishte mbrojtur nga ajo tallje, duke pohuar se një ditë “zëri i kaut” do të dëgjohej deri në skajet më të largta të botës. Kështu ndodhi me Tomën e Akuinit, një nga mendjet më të ndritura teologjike në historinë e Kishës, të cilin më 18 korrik, 700 vjet më parë, Papa Gjoni XXII e shpalli Shenjt me bulën Redemptionem misit.
"Mjeshtri i shpirtit"
Mjeshtër, pa dyshim. Por si e praktikoi Toma i Akuinit shkencën e tij? Këtë pyeti kardinali Marcello Semeraro, i cili dje pasdite, 18 korrik, e kujtoi Shën Tomën nën kupolën e Abacisë së Fossanova-s, në Itali, vendi ku Doktori Engjëllor kaloi ditët e fundit të jetës e ku edhe i mbylli sytë për dritën e kësaj bote në vitin e largët 1274. Në Meshën kremtuar me rastin e 700-vjetorit të shenjtërimit, prefekti i Dikasterit të Vatikanit për Çështjet e Shenjtorëve kujtoi, gjatë predikimit, kushtuar Shën Tomës së Akuinit, faktin se gjithçka që studionte, e meditonte "me fe të zjarrtë". Prandaj mund të themi se sjellja e tij nuk ishte thjeshtë kapardisje intelektuale, por përulësi e thellë e një mësuesi, që nuk e bëri asnjë hap në studimet e tij, pa dëgjuar më parë "Mësuesin shpirtëror", Shpirtin Shenjt, dritën, që i përgatit "zemrat" për të marrë “doktrinën e së vërtetës”.
Heshtje absolute
“Studim dhe soditje, pra: jo dy operacione të shkëputura, por - vuri në dukje kardinali Semeraro - një akt i vetëm ku inteligjenca dhe dashuria shkrihen në një gjë të vetme. Është “Itinerarium in Deum” për të cilin “Shën Toma është rast emblematik”. Kjo, arsyeja pse, në kërkimin e vazhdueshëm të soditjes së Zotit - e pavarësisht nga thellësia teologjike e faqeve ende sot e kësaj dite të patejkalueshme - Doktori i ardhshëm i Kishës, kujtoi Kardinali - prefekt, ditët e fundit të jetës, pati pohuar: "Gjithçka kam shkruar deri tani, nuk më duket tjetër, veçse kashtë". Nuk bëhej fjalë edhe aq për "rraskapitje fizike e edhe psikologjike" – vërejti kardinali Semeraro - i cili më tej citoi, për të shpjeguar ato heshtje të gjata të fratit domenikan, përgjigjen e Antonin-Dalmace Sertillanges, një nga tomistët më të mëdhenj modernë: "Kur e vështira realizohet lehtësisht, atëherë shikohet e pamundura, kështuqë për ne njerëzit, heshtja është kondensimi më i lartë i shkencës".
Letra e Papës
29 qershorin e kaluar, në një Letër drejtuar ipeshkvijve të Latinës, Soras dhe Frosinones me rastin e tre përvjetoreve të Shën Tomës Aquinas - 700 vjetorit të shenjtërimit, 750 vjetorit të vdekjes dhe 800 vjetorit të lindjes - Papa Françesku i ftoi të ulen në shkollën e Doctor Angelicus, të cilin e quante 'gurrë' dhe pasuri e çmuar për Kishën.