Papa: thërret nënën e Miguel Ángel, foshnjës së pagëzuar në Gemelli
R.SH. / Vatikan
Ndër mesazhet e shumta të afërsisë që ka marrë, Papa Françesku "u prek nga përzemërsia e familjes peruane e Miguel Angelit të vogël, të pagëzuar" nga vetë Papa "më 31 marsin e kaluar gjatë një vizite në repartin e onkologjisë pediatrike dhe neurokirurgjisë foshnjore të spitalit Gemelli, i cili dërgoi një poster urimi për shërim të shpejt." Kështu ka bërë të ditur drejtori i zyrës së shtypit të Selisë së Shenjtë, Matteo Bruni. “Ati i Shenjtë deshi të falënderonte personalisht nënën me një telefonatë të shkurtër”.
Në posterin e urimit të dërguar nga familja e Miguel Angel-it të vogël, janë katër fotografi: e para tregon Papën Françesku duke pagëzuar djalin e vogël në djep pranë nënës së tij, e dyta tregon babain me Miguel Angel dhe dy djemtë e tjerë: Jose ' Miguel e Massimo Antonio. Dy fotot e tjera paraqesin Jose' Miguel dhe Massimo Antonio veçmas me Miguel Angel të vogël në krahë.
Në mesazh, në spanjisht, familja nga Peru e falënderon Papën Françesku për pagëzimin e vogëlushit Miguel Angel, duke i uruar shërim të shpejtë. Së bashku me urimet "Recuperate pronto" edhe një dedikim: "Ne vetëm mund të të falënderojmë që bekove vëllanë tonë dhe të urojmë sinqerisht që të shërohesh mirë, dëshirojmë të të takojmë personalisht e të kalojmë një pasdite së bashku, që të njihni më mirë familjen tonë, familjen tuaj, sepse tashmë jeni pjesë e jetës sonë”.