Krajewski, ndihma të reja në Kherson: të mos mësohemi me luftën
R.SH. – Vatikan
Lëmoshtari Apostolik, kardinali Konrad Krajewski, i dërguar për të gjashtën herë nga Papa me mision në Ukrainë për t’i çuar ndihmë dhe ngushëllim popullsisë së sfilitur nga lufta dhe nga pasojat e saj, ndodhet prej disa orësh në Kherson. “Ekspeditë ungjillore”, e përcakton ai misionin e tij në një mesazh zanor dërguar Vatican News.
Në vendet e përmbytura nga shembja e digës
Në qytetin jugor të Ukrainës, ku diga hidroelektrike Kakhovka u shemb para disa kohësh, duke shkaktuar përmbytjen e mbi 80 fshatrave dhe qyteteve, shkatërrimin e 20.000 hektarëve tokë bujqësore dhe derdhjen e mbi 150 tonë nafte, kardinali mbërriti si shofer i një kamioni plot me ushqime (që vinin kryesisht nga Koreja e Jugut), por sidomos me ilaçe, furnizuar nga Vatikani, nga Poliklinika Gemelli dhe nga i ashtuquajturi “banaku pezull i Napolit", traditë e qytetit, sipas së cilës ai, që ka mundësi, lë të paguara mallra të ndryshme për ata, që s’kanë mundësi ekonomike. Siç ka bërë edhe herë të tjera, kardinali u nis i vetëm nga Roma më 22 qershor, duke përshkruar mbi 3125 kilometra. “Rrugë e gjatë, shumë kilometra”, psherëtin ai.
Në Odesë, Drohobych, Mykolaiv…
Të hënën, kardinali ishte në Drohobych, 100 km larg Lvivit, ku vizitoi qendrën humanitare greko-katolike, e cila strehon nevojtarët. Gjithashtu, shkoi të shihte spitalin, qendrën për alkoolistët dhe atë për fëmijët, ku tani, strehohen refugjatë. Më pas, u zhvendos në Mykolaiv, ku vizitoi të vetmen famulli aktive, që mbahet ende në këmbë, pas bombardimeve ruse. Falenderoi famullitarin, i cili nuk është larguar, por edhe njerëzit, të cilëve u dha rruzaret e Papës, duke u lutur së bashku. Mbrëmë (26 qershor), etapa e Odesës, ndërsa sot (27 qershor) në Kherson, i shoqëruar nga ipeshkvi ndihmës i Kharkiv- Zaporizhzhia, imzot Jan Sobiło. “Shkarkuam ilaçet, edhe ato për urgjencën – shpjegon ai në mesazhin zanor. – Një mjek ndau ilaçet, pastaj arritën ambulancat për t’ua shpërndarë qendrave të ndryshme spitalore”.
Në program, edhe një vizitë në qendër të qytetit: “Është gati e shkretë, gjithçka e mbyllur – vëren kardinali Krajewski – Kyr hymë bombardohej e nuk shikonim veçse tymin, një kilometër larg nesh”. Megjithatë, bashkë me famullitarin “shkuam të takoheshim me njerëzit, t’u çonim një ndihmë konkrete”. Sonte, kardinali takohet me bazilianët greko-katolikë: “Do t’u japim përqafimin e Papës për t’u thënë se ai i mendon, se s’ka ditë që të mos lutet për Ukrainën e për të vuajturit”.
Përqafimi i Papës
Kardinali do të udhëtojë edhe në ditët e ardhshme: “Do të qëndrojmë në Kherson për dy ditë dhe pastaj, ndoshta, do të shkojmë drejt Kievit”. Faza e fundit e misionit, në Lviv, qytet ku ka shkuar gjithnjë gjatë udhëtimeve të tjera në Ukrainë.
Nuk ka një datë për kthimin, vetëm një objektiv: “Të rri me këta njerëz në emër të Atit të Shenjtë. Nuk ka nevojë të thuash shumë, thjesht të jesh i pranishëm”, pohon kardinali Krajewski. “Të lutemi për të gjithë – kërkon Lëmoshtari Apostolik – e të lutemi edhe për ne, që të mos mësohemi me këtë luftë, por të vazhdojmë t’i ndihmojmë njerëzit në vështirësi”.