“The Special One”, Mourinho dhe kardinali de Mendonça, ballë për ballë në Gregoriana
R.SH. – Vatikan
Më 31 mars, trajneri i njohur i futbollit, Mourinho – që tifozët e quajnë Mou, ose “The Special One” – do të dialogojë me “ministrin e Kulturës” së Vatikanit, kardinalin Jose’ Tolentino de Mendonça. Ky dialog, që ndokujt mund t’i duket i çuditshëm, është pjesë e nismës së Qendrës për Fenë e Kulturën “Alberto Hurtado” të Universitetit Papnor Gregorian, me rastin e 10-vjetorit të zgjedhjes së Papës Françesku në fronin e Shën Pjetrit. Vërtet, temat e bisedës së prelatit me trajnerin portugez Mou janë perspektivat e hapura nga papnia e Bergoglio-s.
“Qendra Hurtado – shpjegon Gregoriana në një notë për shtyp – ka zgjedhur si temë për ciklin e konferencave publike të përvitshme atë të së ardhmes, ndërmjet frikës e shpresës. Apokalipsi, historia, feja, shpëtimi, shpresa, shëlbimi, janë vetëm disa nga fjalët, që e piketojnë këtë udhë. Por për ta parë të ardhmen me shpresë, nuk mund të mos flitet për të rinjtë”. Kështu, tre takimet e fundit të vitit janë menduar, në bashkëpunim me Ambasadën e Portugalisë në Selinë e Shenjtë, si përgatitje për takimin e Lisbonës, ku nga 1 deri më 6 gushtin e këtij viti do të mbahet Dita e 38-të Botërore e Rinisë. Në këto takime, tre kardinaj do të dialogojnë me personalitete të botës civile për të inkuadruar perspektivat e hapura nga magjisteri i papnisë së Françeskut, duke nxjerrë në pah propozime për brezat e rinj të krishterë.
Më 31 mars, ballë për ballë do të jenë pra, kardinali de Mendonça, prefekt i Dikasterit për Kulturën dhe Edukimin dhe “The Special One”, Mourinho, aktualisht trajneri i Romës, skuadrës së futbollit të kryeqytetit italian. Tema: “Nga fundi i botës”.
Më pas, më 18 prill, Vikari i përgjithshëm i Papës, kardinali Mauro Gambetti, kryeprift i Bazilikës së Shën Pjetrit, do të flasë për enciklikën “Fratelli tutti” me avokatin italian Daniele Bruno, president i Fondacionit Gjon Pali II për Rininë. Së fundi, më 9 maj, ish-prefekti i Këshillit Papnor për Kulturën, kardinali Gianfranco Ravasi, do të diskutojë mbi temat e enciklikës “Laudato si’” me muzikantin e profesorin e letërsisë, Jorge Vaz de Carvalho, nga Universiteti Katolik Portugez.
