Papa priti Orbán e vlerësoi Hungarinё për mbështetjen e refugjatëve ukrainas
R. SH. - Vatikan
Zgjati 40 minuta audienca e Papës me Viktor Orbán, kryeministrin e Hungarisë, një vend, punёn e të cilit për mbrojtjen dhe pritjene refugjatëve që po ikin nga Ukraina Ati i Shenjtë e vlerёsoi. Me të mbërritur në Vatikan, pak para orës 11 të mëngjesit, i shoqëruar nga gruaja e tij dhe një grup prej tre personash, kryeministri hungarez, duke qenë në një vizitë private, nuk u takua me Sekretarin e Shtetit tё Vatikanit, kardinalin Pietro Parolin - këto ditë në Meksikë -, dhe as me Sekretarin për Marrëdhëniet me Shtetet, Imzot Paul Richard Gallagher.
Orbán është në udhëtimin e tij të parë pas fitores së re elektorale të 3 prillit të kaluar: partia Fidesz fitoi shumicën e katërt radhazi parlamentare prej dy të tretash në zgjedhje. “Udhëtimi im i parë zyrtar pas zgjedhjeve do të më çojë në Vatikan, te Papa Françesku”, njoftoi dje vetë Orbán përmes faqes sё Facebook-ut, nga ku sot ka publikuar foton e shtrëngimit të duarve me Papën. Katër vite më parë, pas zgjedhjeve të 2018-ës, udhëtimi i parë i Orbán ishte në Varshavë.
Dyzet minuta bisedë
Audienca në Bibliotekën Apostolike filloi në orën 11.05. “Jam i lumtur pёr praninë tuaj këtu”, tha Papa duke e ftuarin mysafirin të ulet në tryezë. Bisedimet, në prani të një përkthyesi, vazhduan deri në orën 11.45. “Zoti ju bekoftë, Zoti e bekoftë familjen tuaj dhe Hungarinë”, tha Papa në anglisht, duke përshëndetur kryeministrin. I cili, gjithashtu në anglisht, u përgjigj: "Ne ju presim", duke lënë të kuptohet se është ftesё për të vizituar Hungarinë. Përmes zëdhënësit Zoltan Kovacs, kryeministri, në përfundim tё takimit, bëri të ditur se i ka kërkuar Papёs Françeskut “t’i mbështes përpjekjet tona për paqen”.
Dhuratat
Orbán i bëri disa dhurata Atit tё Shenjtё Bergoglio: dy libra, nga dhe për Béla Bartók, kompozitor hungarez dhe ekspert i muzikës. “Nëse e dëgjoni, na dëgjoni ne”, tha kreu politik. Më pas i dhuroi Papёs edhe një koleksion me disqe muzikore operistike dhe një vëllim të vitit 1750 me Lutjen e Orëve për Javën e Shenjtë tё Pashkёve në anglisht dhe latinisht.
Papa Françesku iu përgjigj me dhuratën e një medaljoni prej bronzi që paraqet Shën Martinin e Tours – me prejardhje nga Panonia, Hungaria e sotme - në aktin e mbrojtjes të të varfërit duke i dhënë një pjesë të mantelit të tij. Dhe duke prezantuar këtë dhuratë, Papa komentoi: "E zgjodha këtë për ju, Shën Martinin që është hungarez, dhe mendova në ju hungarezët që tani po i pranoni të gjithë këta refugjatë". Papa i dhuroi gjithashtu edhe dokumentet papnore, Mesazhin për Ditën Botërore të Paqes së këtij viti, Dokumentin për Vëllazërimin Njerëzor, nënshkruar më 2019 në Abu Dhabi dhe librin e botuar nga shtёpia botuese e Vatikanit LEV mbi Statio Orbis të 27 marsit 2020.
