Emërohet një ipeshkëv i ri në Kinë, në kuadrin e Marrëveshjes së Përkohshme
R. SH. - Vatikan
Marrëveshja e përkohshme ndërmjet Selisë së Shenjtë dhe Republikës Popullore të Kinës po sjell frytet e veta. Një ipeshkëv i ri, i treti pas nënshkrimit të marrëveshjes, në shtator 2018, u emërua dhe u shugurua në bashkim me Pasardhësin e Pjetrit. Lajmin e konfirmon drejtori i Sallës vatikanase të Shtypit, Matteo Bruni.
Lidhur me lajmin e shugurimit ipeshkvnor në Qingdao (provinca e Shandong) Bruni pohon: “Mund të konfirmoj se i Nderuari Tommaso CHEN Tinhao është ipeshkvi i tretë i emëruar dhe i shuguruar në kuadrin e normativës së Marrëveshjes së Përkohshme ndërmjet Selisë së Shenjtë dhe Republikës Popullore Kineze mbi emërimin e ipeshkvijve”.
“Mund të shtoj edhe se - pohoi më tej, duke iu përgjigjur pyetjeve të gazetarëve - sigurisht në të ardhmen parashikohen edhe shugurime të tjera ipeshkvnore, sepse po përgatiten procese të ndryshme për emërime të tjera.
Kujtojmë se Marrëveshja e Përkoshme, e përsëritur javët e kaluara edhe për dy vjet të tjera, nuk ka të bëjë drejtpërdrejt me marrëdhëniet diplomatike të Selisë së Shenjtë me Kinën, e as me statusin juridik të Kishës katolike kineze ose me marrëdhëniet ndërmjet klerit dhe autoriteteve të Vendit. Marrëveshja e përkohshme ka të bëjë vetëm me procesin e emërimit të ipeshkvijve, çështje themelore për jetën e Kishës katolike dhe për bashkimin e barinjve të Kishës katolike të Kinës me ipeshkvin e Romës e me ipeshkvijtë e botës.
