Ndërroi jetë Marian Jaworski, kardinali që ngriti përsëri në këmbë Kishën ukrainase
R. SH. - Vatikan
Vdiq më 5 shtator, në moshën 94 vjeçare, kardinali polak, me shtetësi ukrainase, Marian Jaworski, i lindur në Lviv, më 21 gusht 1926.
Mik personal i Karol Wojtylës, pati humbur dorën e majtë gjatë një aksidenti rrugor.
I shuguruar meshtar në vitin 1950, Gjon Pali II e emëroi, më 1984 ipeshkëv titullar i Lambesi-t dhe administrator apostolik i Lvivit. I shërbeu Kishës së Ukrainës në kohën më të vështirë, kur Stalini po rrënonte me themel e pastaj edhe kur nisi të rilindte mbi rrënojat e veta. Shugurimin ipeshkvnor e mori nga kardinali Macharski, asokohe kryeipeshkëv i Krakovit.
Në vitin 1991 u emërua Kryeipeshkëv i Lvivit.
Më 1998 u krijua kardinal in pectore, krijim që u publikua në Koncistorin e 2001-së, me titullin e Shën Sikstit. E “in pectore” do të thotë se emri i tij nuk u shpall publikisht, mbasi sulmi kundër kishës së Ukrainës vijonte e mund t’ia shndërronte titullin e kardinalit, në atë të martirit!
Më 2005 mori pjesë në konklavin, që zgjodhi Benediktin XVI.
Vetë Benedikti XVI e pranoi dorëheqjen nga drejtimi i kryedioqezës së Leopolit, më 2008, për arsye të moshës së shkuar.
Nga viti 1992 deri 2008 ishte Kryetar i Konferencës ipeshkvnore ukrainase.
Tri vjet më parë presidenti polak Duda e dekoroi me Urdhërin e Shqiponjës së Bardhë, nderimi më i lartë që i bën Polonia bijve të vet më të shquar.