Afërsia e Papës me Bjellorusinë: Imzot Gallagher në Minsk
R. SH. - Vatikan
Papa Françesku i ndjek me vëmendje të veçantë ngjarjet, negative e pozitive, që e trondisin a e gëzojnë botën. Këto ditë ndjek posaçërisht situatën në Bjellorusi, prej disa javësh teatër ndeshjesh të ashpra ndërmjet presidentit Lukashenko e opozitës. E sot sekretari i Shtetit të Vatikanit për Marrëdhëniet me Shtetet, imzot Paul Richard Gallagher, ndodhet në Bjellorusi, për t’i dëshmuar Kishës katolike dhe mbarë popullsisë, shqetësimin e Atit të Shenjtë për fatet e vendit. Takim shumë i rëndësishëm ky, në këtë çast vështirësish serioze. Sipas programit, Prelati i lartë do të ketë takime me autoritetet e Shtetit e edhe të Kishës.
Papa kërkon dialog dhe drejtësi për Bjellorusinë
Françesku nuk pushon kurrë së kërkuari paqe për mbarë botën. Kështu edhe në përshëndetjen që shoqëroi lutjen e Engjëllit të Tënzot të 16 gushtit të kaluar, mendimi i tij shkoi në Bjellorusi. Papa u ndalua posaçërisht tek realiteti politik e shoqëror i vendit të dashur bjellorus, duke ia besuar popullin Virgjërës Mari:
“Ndjek me vëmendje situatën pas-elektorale në këtë vend e bëj thirrje për dialog, për refuzimin e dhunës e respektimin e drejtësisë e të së drejtës. Ia besoj të gjitha problemet e bjellorusëve mbrojtjes së Zojës, Mbretëreshë e Paqes”.
Më 18 gushtin e kaluar, në një situatë edhe më të ndërlikuar, Komiteti Ekzekutiv i Drejtësisë i ftoi gjithë të krishterët ta thonë “Atynën” për popullin bjellorus. Bota mbarë u lut përballë situatës aktuale, që po jeton Bjellorusia.
Ndalohet hyrja e imzot Kondrusiewitz në vend
Ndoshta imzot Gallagher nuk do të mund ta takojë Kryeipeshkvin e Minskut, imzot Tadeusz Kondrusiewitz, që po i ndjek nga Polonia ngjarjet në Bjellorusi, pasi iu ndalua hyrja në atdhe. Më 31 gusht, kryeipeshkvi i Minskut dhe kryetar i ipeshkvijve katolikë në Bjellorusi, imzot Tadeusz Kondrusiewitz, ndërsa po kthehej nga një shtegtim në Poloni, ku kishte shkuar për të marrë pjesë në kremtimet për nder të Zojës së Czestochow-ës, u ndalua në pikën e kufirit Kuznitsa Belostokskaja nga rojet, që nuk e lejuan të rikthehej në atdhe. Prelati iu drejtua besimtarëve të kryedioqezës së vet, duke u kërkuar të luten për rikthimin e tij sa më të shpejtë në Bjellorusi e për zgjidhjen paqësore të krizës së rëndë shoqërore e politike në vend.
