Selia e Shenjtë: të ndihmohen vendet e varfra për të dalur nga "kurthi i borxhit"

R.SH. - Vatikan

Përfaqësuesi i Selisë së Shenjtë pohoi se një nga vështirësitë më të mëdha për vendet në zhvillim është "kurthi i borxhit", i cili është rritur me 8.5% gjatë dekadës së fundit, duke arritur në 7.64 trilionë dollarë në 2017. Gjithnjë vitin e kaluar të njëjtat vende të varfëra kanë përdorur pothuajse 14% të të ardhurave nga eksporti. Shumica e këtyre vendeve që Fondi Monetar i konsideron se janë "rrezik i lartë", gjenden në zonën sub-Sahariane. Eshtë fjala - tha imzot Jurkovič – për një barrë të padurueshme që e vë në rrezik gjithë ekonominë afrikane.

Rritja e borxhit të jashtëm për shkak të krizës financiare globale

Rritja e borxhit të vendeve në zhvillim është rezultat i bërthamës "së sëmurë" të krizës aktuale ekonomike globale. Selia e Shenjtë - vazhdoi Imzot Jurkovič -  ka vënë tashmë në dukje se sistemi aktual nuk përputhet me "natyrën e vetë të vërtetë", e cila është për të favorizuar përdorimin e burimeve të ruajtura dhe, ku është e mundur, të promovojë ekonominë reale, mirëqenien, zhvillimin e të gjithë njerëzve. Kriza globale financiare e vitit 2008 ka treguar shumë qartë se sistemi aktual ekonomik dhe financiar botëror, nxit përhapjen e "risive të errëta financiare", paralele me një ekonomi reale, për të cilën është vështirë t’i llogaritet rreziku.

Fitimi nuk është i ligjshëm, kur nuk shikohet promovimi integral i njeriut

Selia e Shenjtë - vëren Imzot Jurkoviç - riafirmon bindjen se debati mbi çështjet ekonomike dhe financiare nuk mund të shpërfillë parimet etike siç janë liria, drejtësia dhe solidariteti që synojnë të promovojnë zhvillimin integral të njeriut duke e vendosur njeriun në qendër të sistemit ekonomik botëror. Kjo do të thotë që ne duhet të njohim vlefshmërinë e strategjive ekonomike që synojnë mbi të gjitha promovimin e barazisë dhe që, përtej zgjerimit pa dallim të fitimeve, ecën rrugës drejt mirëqenies integrale të njeriut në tërësi  si dhe të çdo personi. Fitimi nuk është në fakt i ligjshëm, kur nuk e shikon promovimin integral njerëzor, përhapjen universale të mallrave dhe opsionin preferencial për të varfrit. Tregjet duhet t'u shërbejnë interesave të popujve dhe të mirës së përbashkët të njerëzimit.