Kërko

Cookie Policy
The portal Vatican News uses technical or similar cookies to make navigation easier and guarantee the use of the services. Furthermore, technical and analysis cookies from third parties may be used. If you want to know more click here. By closing this banner you consent to the use of cookies.
I AGREE
Allegro con brio
Programe Podcast

Papa: në Korsikë, i lumtur që pashë një popull me fëmijë

Për shkak të kohës së shkurtër të fluturimit, Françesku nuk e dha konferencën e zakonshme për shtyp me gazetarët, që e ndiqnin. Megjithatë, deshi të shprehte gëzimin e tij për numrin e madh të prindërve me fëmijë në Ajaccio: “Është tokë që bën fëmijë. Në vendet e tjera nuk shiheshin kund. Në Timorin Lindor dhe këtu, po”. Për Papën, një tortë surprizë nga gazetarët për 88-vjetorin e lindjes, që do ta kremtojë të martën, më 17 dhjetor

R.SH. – Vatikan

Asnjë konferencë për shtyp, si zakonisht pas çdo udhëtimi apostolik, pasi fluturimi i kthimit nga Ajaccio në Romë ishte i shkurtër (më pak se 40 minuta). Megjithatë, Papa i përshëndeti 67 gazetarët, që e shoqëruan në këto dhjetë orë në Korsikë, duke u shprehur gëzimin për fëmijët e shumtë, që pa gjatë takimeve, veçanërisht në meshën në Place d'Austerlitz.

Një tokë që bën fëmijë

“Ju falënderoj shumë për punën tuaj”, filloi Papa. “Dëshiroj të nënvizoj një gjë: a e patë sa shumë fëmijë kishte? Kjo është tokë, që bën fëmijë. Mendoni për udhëtimet e tjera ku nuk mund t'i shihje". “Si në Timorin Lindor, ashtu edhe këtu – shtoi Papa, duke kujtuar një nga fazat e shtegtimit të tij të gjatë të shtatorit në Azinë Juglindore dhe në Oqeani – jam i lumtur që pashë një popull, i cili bën fëmijë. Kjo është e ardhmja”.

“Faleminderit shumë për punën tuaj”, u përsëriti Papa gazetarëve, kameramanëve dhe fotografëve. “Faleminderit shumë për këtë. Shihemi udhëtimin tjetër!” “Ku?” pyetën gazetarët. “Nuk e di!”, u përgjigj Papa duke buzëqeshur.

Festa surprizë

Pavarësisht nga udhëtimi i shkurtër, gazetarët arritën t’i bënin Papës një surprizë, duke i dhën një tortë për 88-vjetorin e ditëlindjes, që do ta kremtojë të martën, më 17 dhjetor. Në të vërtetë, torta nuk ishte e vërtetë, por simbolike, me tre kate, realizuar nga një laborator në Romë, me ngjyra bardh e verdh të flamurit vatikanas e me mbishkrimin “Urime Papa Françesku”, nën një statujë të vogël të Atit të Shenjtë ulur me gishtin lart. Ajo iu dorëzua Papës nga gazetarja meksikane Valentina Alazraki, dekane e vatikanistëve, korrespondente historike e Televisa Univision dhe presidente e sapozgjedhur e Aigav (shoqata e vatikanistëve), me 161 udhëtime papnore në kurrikulum. “Të gjithë gazetarët iu urojnë ditëlindjen,” tha Alazraki ndërsa dorëzonte dhuratën. “Është e rreme, kështu që nuk ka gjë se po ua japim para ditëlindjes”, shtoi me shaka, ndërmjet të qeshurave të të pranishmëve. Qeshi edhe Papa, i cili tha disa herë “faleminderit”, duke bekuar me dorë ata, që vitet e fundit i ka cilësuar gjithmonë si “shokë udhëtimi”.

15 dhjetor 2024, 20:07
Prev
April 2025
SuMoTuWeThFrSa
  12345
6789101112
13141516171819
20212223242526
27282930   
Next
May 2025
SuMoTuWeThFrSa
    123
45678910
11121314151617
18192021222324
25262728293031