Papa niset për në Azi dhe Oqeani. Më parë, takimi me të pastrehët
R.SH. – Vatikan
Tashmë është zyrtare. Papa Françesku u nis për në Azi e Oqeani, duke filluar kështu udhëtimin e tij të 45-të apostolik ndërkombëtar. Avioni papnor, së bashku me shoqëruesit e Atit të Shenjtë dhe me gazetarët, u ngrit nga aeroporti i Fiumicino-s, pranë Romës, pak pas orës 17.30, drejt Indonezisë, etapa e parë e shtegtimit.
Takimi me të pastrehët
Siç njofton Salla e Shtypit e Vatikanit, rreth orës 16.00, Ati i Shenjtë u takua me një grup prej 15 të pastrehësh në Shtëpinë e Shën Martës. Në këtë takim, që po bëhet traditë para udhëtimeve të Françeskut, të pastrehët shoqëroheshin nga Lëmoshtari Apostolik, kardinali Konrad Krajewski.
Kujtojmë se udhëtimi aktual është më i gjati i papnisë (2-13 shtator). Françesku do të vizitojë katër vende: Indonezinë, Papua Guinenë e Re, Timorin Lindor dhe Singaporin. Mbërritja në kryeqytetin indonezian, Xhakartë, parashikohet nesër në orën 11.30 me orën lokale, 6.30 me atë në trevat shqiptare.
Telegrami për Italinë
Në telegramin dërguar presidentit italian Sergio Mattarella, Papa - duke uruar "paqe dhe begati për vendin" - nënvizon rëndësinë e takimeve, që e presin "në ato kombe të pasura me vlera njerëzore dhe shpirtërore", për t'u ndarë me të tjerët në frymën e “bashkimit, të solidaritetit dhe të dialogut, edhe në kohë e situata të karakterizuara nga sprova”. Në Azi dhe Oqeani, lexojmë në mesazhin e përgjigjes së kreut të shtetit italian, Papa do të çojë “një mesazh universal të shpresës, të vëllazërimit, të dialogut ndërmjet kulturave dhe feve të ndryshme, me vetëdijen se zgjidhja e problemeve të sotme kërkon bashkëpunimin e të gjithëve".
