Dhimbja e Papës për viktimat e tërmetit në Tajvan

R.SH. / Vatikan

Papa Françesku shpreh "dhimbjen e thellë" për humbjen e jetëve njerëzore dhe dëmet e shkaktuara nga tërmeti i tmerrshëm me magnitudë 7.2 që goditi bregun lindor të ishullit të Tajvanit dje, më 3 prill, duke shkaktuar deri tani, sipas autoriteteve lokale, dhjetë viktima, mbi një mijë persona të plagosur, ndërsa rreth 700 janë ende të zhdukur ose të bllokuar nën rrënoja.

Në një telegram të nënshkruar nga Sekretari i Shtetit të Selisë së Shenjtë, Kardinali Pietro Parolin, drejtuar presidentit të Konferencës Episkopale Rajonale Kineze (CRBC), John Baptist Lee Keh-Mean, Papa Françesku "siguron solidaritetin e përzemërt dhe afërsinë shpirtërore me të gjithë ata që janë prekur nga kjo katastrofë”.

Papa, thuhet më tej në telegram, "lutet për të vdekurit, të plagosurit dhe të gjithë të zhvendosurit", si dhe "për personelin e urgjencës të përfshirë në përpjekjet për rikuperim". Mbi të gjitha, Papa kërkon "bekimin hyjnor të ngushëllimit dhe forcës".

Goditjet

Tërmeti i dhunshëm goditi zonën lindore të Tajvanit dje: një goditje e parë me magnitudë 7.2 u pasua nga njëqind pasgoditje të tjera, nga të cilat të paktën dy ishin më të mëdha se 6 ballë. Epiqendra, tha instituti gjeofizik amerikan Usgs, ishte 18. km në jug-lindje të qytetit Hualien, rreth 155 km në jug të kryeqytetit, Taipei, dhe në një thellësi prej 34.8 km.