Papa, murgeshave: shërbimi jo për dukje është më i pëlqyeshëm në sytë e Zotit
R.SH. – Vatikan
Kërkimi i Zotit, dëshmia e Ungjillit dhe dashuria për jetën e padukshme: këto janë elementet, që karakterizuan përvojën e Charles de Foucauld, të cilat Papa Françesku ua vuri në dukje Motrave të vogla të Jezusit, pritur sot në audiencë, me rastin e Kapitullit të tyre të Përgjithshëm. Papa theksoi, para së gjithash, sa e rëndësishme është të dëgjohet Fjala e Zotit, në adhurim përpara Tabernakullit, sepse në këtë mënyrë “zemrat hapen për rrugët e Hyjit, i cili nuk ushtron dhunë ndaj njerëzve, por frymëzon mendime dhe ndjenja krijuese përkatësie, gatishmërie dhe shërbimi”.
“Jezusi ju ofron dashurinë e tij dhe ju takon juve ta pranoni sfidën, duke lënë mënjanë amforat e rënda të vetëreferencimit dhe të rutinës, të zgjidhjeve të lehta e edhe të njëfarë pesimizmi, që armiku i Hyjit dhe i njeriut përpiqet gjithmonë të infiltrojë, sidomos tek ata që e kanë kthyer jetën e tyre në dhuratë”.
Dëshmojeni Ungjillin, duke treguar kujdes për të tjerët
Më pas, Françesku u kujtoi motrave ftesën e frymëzuesit të tyre Charles de Foucauld për ta shpallur Ungjillin me gjithë vetveten mbi çatitë e botës, duke u çuar njerëzve Jezu Krishtin e duke iu kushtuar të afërmit me lutje, mirësi e shembullin personal.
“Të kujdesesh për të tjerët, t’u japësh nevojtarëve pa pritur që ata të kërkojnë ndonjë gjë: këto janë shenjat e dashurisë për Dhëndrrin hyjnor, tipare karakteristike të afërsisë suaj plot kujdes për të fundmit, në të cilët Ai është i pranishëm. Afërsia. Një afërsi kaq e çmuar në një shoqëri si kjo e jona, në të cilën, pavarësisht nga mjetet e shumta, në vend që të shtohen punët e mira, duket sikur zemrat ngurtësohen dhe mbyllen. Afërsia është spontane, kjo ka rëndësi, ajo lind nga spontaniteti i zemrës. Afërsi, afërsi!”
Udha e Nazaretit
Duke i ftuar murgeshat të luftojnë indiferencën e të japin dëshminë e vëllazërimit me të varfërit, Ati i Shenjtë u kërkoi atyre të mos u shërbejnë të tjerëve vetëm për t’u dukur në sytë e botës, por të ndjekin “udhën e mishërimit, udhën e Nazaretit, atë që u tregon Zoti”, kur bëhet i vogël për të vegjlit. Udha e shërbimit të padukshëm është rruga e Zotit, nënvizoi Papa.
“Kjo është e bukur, është e rëndësishme: rruga e fshehjes është rruga e Zotit. Ju nuk jeni murgesha për reklamë: sa më të padukshme aq më hyjnore, sa më të padukshme aq më hyjnore. Vazhdoni ta kultivoni këtë, është profeci e fuqishme për kohën tonë, ndotur nga dukja. Duket se për këtë arsye jetojmë një kulturë makijazhi: të gjithë bëjnë makijazh, është normale për femrat, por të gjithë, të gjithë bëjnë makijazh për t’u dukur më të mirë se ç’janë, por kjo nuk vjen nga Zoti”.