Françesku: të lirohen pengjet e të hyjnë ndihmat humanitare në Gaza
R. SH. - Vatikan
Situata dramatike në Lindjen e Mesme vazhdon të jetë në qendër të vëmendjes edhe në fjalët e Papës. Në përshëndetjet pas audiencës, duke iu drejtuar shtegtarëve italianë, Françesku përsëriti thirrjen për paqe në Izrael, në Palestinë, në Ukrainë dhe në mbarë botën:
“Inkurajoj lirimin e pengjeve dhe hyrjen e ndihmave humanitare në Gaza. Vazhdoj të lutem për ata që vuajnë e të shpresoj për shtigjet e paqes në Lindjen e Mesme, në Ukrainën e torturuar dhe në rajone të tjera të plagosura nga lufta”.
Papa: Ungjilli nuk mund të predikohet në mënyrë abstrakte, duhet t’i përshtatet gjithnjë kulturave.
Françesku kujtoi, më pas, të premten, 27 tetor, ditë agjërimi, lutjeje e pendimi, e edhe orën 18:00 në Shën Pjetër, kur - rikujtoi - "do të mblidhemi e të lutemi për të kërkuar paqen në botë".
Në përshëndetjet për shtegtarët e gjuhës portugeze, Papa ia besoi Zojës "urgjencën e paqes":
“Të mos lejojmë që retë e konfliktit të fshehin diellin e shpresës. E t’ia besojmë Zojës urgjencën e paqes, në mënyrë që të gjitha kulturat t’ia hapin zemrat frymëzimit të harmonisë së Shpirtit Shenjt”.