Françesku: lufta është gjithmonë humbje, ndaluni!

R. SH. - Vatikan

Lufta, çdo luftë, është gjithmonë disfatë, shkatërrim i vëllazërisë njerëzore. Zëri i Françeskut është i rëndë, ndërsa u drejtohet besimtarëve të mbledhur në Sheshin e Shën Pjetrit për Engjëllin e së Dielës. Ndërsa mendon për tragjedinë që po luhet në Izrael dhe në Palestinë, Papës i duhet të bëjë përsëri thirrje që të heshtin armët:

“Jam shumë i shqetësuar dhe i pikëlluar, lutem dhe jam pranë të gjithë atyre që vuajnë, pengjeve, të lënduarve, viktimave dhe familjeve të tyre”.

Ashtu si ditët e fundit, për herë të fundit të mërkurën e kaluar gjatë audiencës së përgjithshme, mendimet e Françeskut kthehen e rikthehen tek "situata serioze humanitare në Gaza" si dhe tek dhuna, që ditët e fundit i ka prekur edhe vendet e krishtera:

“Më pikëllon lajmi sipas të cilit ditët e fundit  u goditën spitali anglikan dhe famullia ortodokse greke. Përsëris thirrjen time që të krijohen hapësirat e duhura, ndihma humanitare të vazhdojë të arrijë dhe pengjet të lirohen”.

Papa kujton edhe se 27 tetori i ardhshëm do të jetë  ditë agjërimi, lutje dhe pendese dhe se atë mbrëmje, në orën 18:00, në Shën Pjetër do të jetohet një orë lutjeje, për të kërkuar paqe në botë:

“Lufta, çdo luftë në botë, mendoj edhe për Ukrainën e martirizuar, është  disfatë. Ndaluni!”.