Përqafimi i Papës me fëmijët e Kampit Veror të Vatikanit

R.SH. - Vatikan

I pritur me këngë dhe valle, duartrokitje dhe buzëqeshje spontane, Papa Françesku takoi sot paradite rreth 250 fëmijët dhe të rinjtë e moshës 5 deri në 13 vjeç, që po marrin pjesë në edicionin e vitit 2023 të Kampit Veror në Vatikan. Është fjala për fëmijët e punonjësve të Selisë së Shenjtë, të cilët në Sallën Pali VI, kalojnë verën të ndjekur nga argëtues dhe edukatorë ekspertë. Një veprimtari "shumë e vlerësuar", siç pohoi vetë Françesku në Engjëllin e Tënzot të së dielës së kaluar. I shoqëruar nga Át Franco Fontana, drejtor i bashkësisë saleziane të Vatikanit, Papa foli me të rinjtë dhe fëmijët e ndarë në tre grupe dhe tre ngjyra, sipas moshës: nga 5 në 7 vjeç, nga 8 në 10 vjeç dhe nga 11 në 13 vjeç. Dy vogëlushë i dhuruan Papës një pankartë me një vizatim dhe me mbishkrimin " You help us to bee heroes", një lojë fjalësh në anglisht në të cilën folja "be", të jesh, zëvendësohet me "bee", bletë, e cila është tema e edicionit të sivjetëm të Kampit Veror, së bashku me atë të superheronjve. E fjala "Hero" ishte shkruar bukur në një medaljon prej kartoni, dorëzuar Papës, i cili e vuri menjëherë në qafë.

Para se të takohej me fëmijët, Papa bisedoi me animatorët dhe argëtuesit në Sallën Pali VI, si edhe me partnerët, që mbështetën projektin “Vera e Fëmijëve”, duke besuar menjëherë në të dhe duke kontribuar aktivisht përmes laboratoreve dhe nismave të tjera.