Papa - në Marsejë për "Rencontres Méditerranéennes"
R. SH. - Vatikan
Lajmet e Vatikanit
Pesë brigje, tridhjetë vende, një dëshirë e vetme për t'i dhënë jetë një "fshati" ideal, të ndjeshëm ndaj solidaritetit dhe kujdesit për krijimin. Pikërisht këtë fshat Papa do ta vizitojë në fund të shtatorit, siç e ka paralajmëruar edhe vetë, kur nga data 22 deri më 23 të muajit do të jetë në qytetin e Marsejës e ku, nga data 17 deri më 24, do të ndjekë "Rencontres Méditerranéennes", festival, i cili synon t’i bashkojë të rinjtë e të gjitha feve, së bashku me ipeshkvijtë, shoqatat dhe lëvizjet nga vendet që lagen nga Mesdheu.
Programi i datës 22
Salla e Shtypit e Vatikanit njoftoi sot fazat e vizitës dyditore apostolike në qytetin francez. Françesku do të niset nga Roma pasditen e 22 shtatorit, në orën 14:35 nga aeroporti Fiumicino dhe do të ulet në orën 16:15 në aeroportin ndërkombëtar të Marsejës ku, për ta pritur, do të jetë i pranishëm presidenti i Republikës Macron. Një orë më vonë Papa do të përshëndesë klerin dioqezan dhe do t'i lutet Virgjërës Mari në Bazilikën e "Notre Dame de la Garde", më pas, në orën 18:00, pranë Memorialit kushtuar marinarëve dhe emigrantëve të humbur në det, do të jetojë një çast kujtimi me krerët fetarë, të cilëve do t'u drejtojë një fjalim.
Takimet e ditës së dytë
Takimi i parë i së shtunës, 23 shtator, do të jetë për Françeskun takim privat, në arqipeshkvinë e Marsejës, me disa njerëz që jetojnë në kushte të vështira ekonomike. Në orën 10, çasti kryesor i vizitës, me pjesëmarrjen në sesionin final të "Rencontres Méditerranéennes" në "Palais du Pharo", gjatë të cilit Papa do të mbajë një fjalim për të pranishmit. Në të njëjtin ambient, takimi me Presidentin e Republikës është planifikuar rreth orës 11.30, më pas mesha finale e vizitës, pasdite, në orën 4.15, të cilën Françesku do ta kryesojë në “Stadium Vélodrome” në Marsejë. Në orën 18.45 Papa do të kthehet në aeroport për ceremoninë e lamtumirës. Fluturimi, sipas planifikimit, do të nisë në orën 19.15, për të mbërrijtë në Romë-Fiumicino, në orën 20.50.