Papa: imzot Bettazzi, dëshmitar i patrembur i Koncilit
R.SH. – Vatikan
Do të kishte mbushur 100 vjeç në nëntor, imzot Luigi Bettazzi, i fundmi prej etërve italianë të Koncilit II të Vatikanit, që ndërroi jetë të dielën, më 16 korrik. Papa Françesku e kujton sot, kur iu kremtua funerali, me një telegram ngushëllimi drejtuar ipeshkvit të Ivreas e nënshkruar nga Sekretari i Shtetit të Selisë së Shenjtë, kardinali Pietro Parolin.
Telegrami i Papës
Duke u shprehur afërsinë shpirtërore familjarëve dhe miqve të atij, që shërbeu për 33 vite pikërisht si ipeshkëv i Ivreas e për 17 vite si kryetar i “Pax Christi”-t, lëvizjes katolike të impenjuar për drejtësinë e paqen në botë, Papa “e kujton si të apasionuar të madh të Ungjillit, i cili u dallua për afërsinë me të varfërit, duke u bërë shenjë profetike e drejtësisë dhe e paqes në kohë të veçanta të historisë së Kishës”. Gjithashtu, Ati i Shenjtë e përmend si “njeri të dialogut e pikë referimi për eksponentë të shumtë të jetës publike e politike” të Italisë. Falënderon Zotin “për këtë dëshmitar të patrembur të Koncilit” dhe i kërkon të Gjithpushtetshmit “shpërblimin e amshuar, premtuar për shërbëtorët besnikë”, duke u dhënë të gjithëve, që e njohën dhe e deshën, bekimin e tij apostolik.
Kush ishte imzot Bettazzi
Lindur në Treviso të Italisë, më 26 nëntor 1923, shuguruar meshtar njëzet e tri vjet më vonë, Bettazzi u diplomua për teologji në Universitetin Papnor Gregorian dhe më pas për filozofi në Universitetin Alma Mater të Bolonjës. Në kryedioqezën e Bolonjës, u bë ipeshkëv ndihmës i kardinalit Giacomo Lercaro dhe, krah tij, mori pjesë në vitin 1963, në Koncilin II të Vatikanit, ku vetë kardinali ishte një nga protagonistët.
Pakti i Katakombeve
Më 16 nëntor 1965, disa ditë para mbylljes së Koncilit, imzot Bettazzi zbriti me rreth dyzet etër konciliarë – kryesisht latino-amerikanë – në katakombet e Domitilla-s në Romë për të kremtuar një meshë, gjatë së cilës iu kërkua Hyjit besnikëri ndaj Shpirtit të Jezusit. Në fund, të gjithë ipeshkvijtë nënshkruan Paktin e famshëm të Katakombeve, me të cilin i nxisnin "vëllezërit e tyre ipeshkvij" të impenjoheshin në një "jetë të varfër", për një Kishë "shërbëtore dhe të varfër", siç pati këshilluar Papa shenjt Gjoni XXIII.
Në krye të “Pax Christi”-t
Nga viti 1966 deri në vitin 1999, imzot Bettazzi udhëhoqi si ipeshkëv dioqezën e Ivreas; në vitin 1968, u emërua fillimisht kryetar kombëtar e, më pas, më 1978, president ndërkombëtar i lëvizjes katolike për drejtësi e paqe “Pax Christi”. Kujtohen mirë thirrjet e vazhdueshme të tij për paqe, sidomos ftesa e prerë për t’iu kundërvënë nga pikëpamja fiskale shpenzimeve ushtarake, si edhe mbështetja e "Edukimit për Paqen", për të cilën u nderua me Çmimin Ndërkombëtar të UNESCO-s, në vitin 1985. Ai përkrahu lëvizjet pacifiste e mori pjesë në marshimin e Sarajevës, në vitin 1992, në mes të luftës civile në Bosnjë-Hercegovinë, krah për krah don Tonino Bello-s, të sprovuar rëndë nga sëmundja. Edhe majin e kaluar, në Ivrea, imzot Bettazzi 99 vjeçar mori pjesë në Stafetën e Humanizmit për paqen në Ukrainë. Funerali i tij u kremtua sot në Duomon e Ivreas, ku edhe u varros, në praninë e gjithë qytetarëve, në këtë ditë zie shpallur nga autoritetet.
