Papa Françesku do të takohet me rreth 200 artistë, në Kapelën Sikstine
R. SH. - Vatikan
Me rastin e 50-vjetorit të përurimit të Koleksionit të Artit Modern dhe Bashkëkohor në Muzetë e Vatikanit, të premten, më 23 qershor 2023, Papa Françesku do të presë në Kapelën Sikstine rreth 200 nga krijuesit më të shquar bashkëkohorë: piktorë, skulptorë, arkitektë, shkrimtarë, poetë, muzikantë, regjisorë dhe aktorë.
Muzetë e Vatikanit: 50 vjetët e para të Koleksionit të Artit Bashkëkohor
Audienca - nënvizon një notë e Dikasterit për Kulturën dhe Arsimin - është pjesë e një serie takimesh papnore, kushtuar artistëve, akti i parë i të cilëve nis në vitin 1964, kur Pali VI kërkoi të përtërihej miqësia ndërmjet Kishës dhe artistëve. Ndaj Ati i Shenjtë dëshiron të kremtojë veprën dhe jetën e artistëve, duke vënë në dukje kontributin e tyre në edukimin e ndjenjës së humanizmit të përbashkët dhe në promovimin e vlerave të përbashkëta.
“Nisma thekson rolin e Dikasterit për Kulturën dhe Arsimin, parë si promovues i marrëdhënieve ndërmjet Selisë së Shenjtë dhe botës së Kulturës, duke favorizuar dialogun si mjet i domosdoshëm i takimit të vërtetë, i ndërveprimit dhe pasurimit të ndërsjellë, në mënyrë që punonjësit e arteve, të letërsisë dhe të kulturës, në të gjitha format e saj, të njihen nga Kisha si njerëz në shërbim të kërkimit të sinqertë të së vërtetës, të së mirës dhe të së bukurës”.
De Mendonça: “Të rilidhet miqësia e Kishës me artistët"
Prefekti i Dikasterit për Kulturën dhe Arsimin, Kardinali José Tolentino de Mendonça, poet i njohur, pohon se “Kisha duhet ta rilidhë miqësinë me artistët, e interesuar siç është për pyetjet që bën sot bota bashkëkohore (sa ato aktuale, përplot me dramaticitete, ashtu edhe ato tejet vizionare, që shikojnë drejt kohëve të reja e të shpresuara) e gatshme për të pasuruar dialogun dhe mirëkuptimin e ndërsjellë".
Veprimtaria, e promovuar nga Dikasteri për Kulturën dhe Arsimin, organizohet në bashkëpunim me Guvernatoratin e Shtetit të Qytetit të Vatikanit, Muzetë e Vatikanit dhe Dikasterin për Komunikimin.