Papa: Ukraina vuan shumë, të lutemi për kthimin e paqes
R. SH. - Vatikan
Në përshëndetjet drejtuar shtegtarëve në përfundim të katekizmit të audiencës së përgjithshme të kësaj të mërkure, Papa Françesku kujtoi rishtas luftën e pandërprerë në Ukrainë dhe nevojën e lutjes për fundin e saj. "Ne të gjithë i lutemi Zotit për Ukrainën e torturuar, ku njerëzit vuajnë shumë, vuajnë shumë atje. Të lutemi për të plagosurit, për fëmijët, për ata që kanë vdekur, për kthimin e paqes".
Polakëve: t'ia besojmë problemet e botës martirit Bobola
Duke përshëndetur shtegtarët polakë, veçanërisht grupin e impenjuar për të mbrojtur jetën e Vëllazërisë "Małych stópek", Papa kujtoi se dje Kisha në Poloni përkujtoi Shën Andrew Bobola-n, meshtar jezuit martir e, më pas, mendimet e tij shkuan përsëri tek lufta.
"Atij - kujtoi - ia besojmë të gjitha çështjet e vështira të atdheut tuaj e edhe të vendeve të tjera, veçanërisht çështjen e paqes në Ukrainë".
Ta themi Rruzaren, për të gëzuar paqen
Së fundi, duke iu drejtuar besimtarëve arabishtfolës, Françesku nënvizoi vlerën e lutjes, veçanërisht për të kërkuar ndërmjetësimin e Virgjërës Mari, duke kujtuar se posaçërisht në muajin maj thuhet Rruzarja "përmbledhje e gjithë historisë së shëlbimit tonë”.
E në përfundim Papa rikujtoi “se Rruzarja Shenjte është armë e fuqishme kundër së keqes dhe mjet i frytshëm për të fituar paqen e vërtetë në zemrat tona”.