Papa, ipeshkvijve italianë: “jo” logjikës së pushtetit, Kisha s'është për pak vetë
R.SH. – Vatikan
“Ta kuptosh se të gjithë janë bashkëpërgjegjës në Kishë nuk do të thotë të zbatosh logjika të kësaj bote për ndarjen e pushtetit, por të kultivosh dëshirën për ta njohur tjetrin në pasurinë e karizmave dhe të individualitetit të tij”. Këtë tha sot Papa Françesku në audiencën me ipeshkvijtë italianë, pjesëmarrës në Takimin Kombëtar të përfaqësuesve dioqezanë të Rrugës Sinodale Italiane.
“Kështu – vërejti Ati i Shenjtë Bergoglio – mund të gjejnë vendin e tyre të gjithë ata, që ende kanë vështirësi për t’u njohur nga Kisha, ata që nuk kanë zë, ata të cilëve u mbulohet zëri e madje, heshtohen, ose injorohen, ata që e ndiejnë veten të papërshtatshëm, ndoshta, sepse kanë ndërmarrë rrugë të vështira a të ndërlikuara në jetë. Por, duhet ta kujtojmë: Kisha duhet ta bëjë të dukshme zemrën e Zotit; zemër e hapur për të gjithë – vijoi Papa. – Duhet ta pyesim veten sa u japim hapësirë dhe sa i dëgjojmë me të vërtetë në bashkësitë tona zërat e të rinjve, të grave, të të varfërve, të të zhgënjyerve, të të plagosurve nga jeta e të atyre, që janë zemëruar me Kishën. Derisa prania e tyre do të mbetet sporadike në kuadrin e jetës kishtare, Kisha nuk do të jetë sinodale, do të jetë Kishë për pak vetë”.