Papa në Asti: qytetar nderi, përshëndet besimtarët nga papamobili
R. SH. - Vatikan
Dita e dytë e Papës Françesku në Asti, ajo publike, pas privates të së shtunës, kaluar në gjirin e të afërmve dhe të moshuarve në një shtëpi pushimi, filloi në kurien ipeshkvore, ku është i ftuar e ku u takua me kryebashkiakun e Astit, presidentin e Rajonit të Piemontes, Alberto Cirio dhe përfaqësues të tjerë të institucioneve vendore. Kryebashkiaku Maurizio Rasero i dorëzoi nënshtetësinë e nderit Papës “për angazhimin e tij të vazhdueshëm për paqen në botë dhe mesazhet e përditshme të solidaritetit dhe të vëllazërisë kundër të gjitha formave të diskriminimit", vlera të parashikuara edhe nga Statuti i Qytetit të Astit, e edhe për Lidhjen e vazhdueshme me zonat e Astit dhe të Piemontit, siç dëshmohet nga vazhdimësia e kontakteve me familjen dhe institucionet, e përfaqësuar simbolikisht nga thesi i vogël me tokën e Astit, marrë nga Bricco Marmorito.
Në papamobil nga Kuria ipeshkvnore, në Katedrale
Pas këtij çasti të parë publik, Françesku vijoi rrugëtimin me papamobil mes njerëzve, që mbushën plot qendrën e Astit qysh nga orët e para të mëngjesit. Nga Kuria Papa përshkoi 1.7 kilometra, për të arritur në Piazza Catena ku e prisnin të gjymtuarit dhe të sëmurët. Mbërriti në katedrale rreth orës 10.30 për të kremtuar Meshën në solemnitetin e Krishtit Mbret i Universit, Ditën Botërore të Rinisë që kremtohej në Dioqezë dhe më pas, Engjëllin e Tënzot. I ndjekur nga 25,000 vetë, 4,000 prej të cilëve janë në katedralen e madhe dhe shumë të tjerë në hapësirat e ngritura jashtë me ekrane gjigante.