Françesku: përkrah ukrainasve, popull fisnik dhe martir

R.SH. - Vatikan

Shkoi përsëri në Ukrainë, në gjirin e popullit të këtij vendi-martir, mendimi i Papës në fund të audiencës së përgjithshme. Thellësisht i pikëlluar për “situatën e tmerrshme në Ukrainën e torturuar”, Ati i Shenjtë Bergoglio tërhoqi vëmendjen e botës tek kjo luftë e pakuptim dhe e pafund!  E foli edhe  për misionin e lëmoshtarit të tij, kardinalit Konrad Krajewski, të cilin e dërgoi në vend për të katërtën herë, që njerëzit e sprovuar rëndë nga konflikti me Rusinë ta ndjenin konkretisht ngrohtësinë e Atit për bijtë.

Të shtunën e kaluar edhe Kardinali e provoi tmerrin e luftës mbi lëkurën e vet, duke rrezikuar jetën, pasi automobili i tij i ngarkuar me ushqime dhe rruzare, dhuratë e  Papës për ata njerëz që kanë aq shumë nevojë për lutje, u godit në afërsi të Zaporizhës me armë zjarri, por nuk pati pasoja të rënda e, çka është më e rëndësishme, ndihma e Papës  arriti në destinacion:

“Dje më telefonoi. Po e kalon kohën atje, duke ndihmuar në zonën e Odesës, shumë pranë njerëzve që vuajnë”..

Papa Françesku tregoi me hollësi bisedën e tij me kardinalin Krajewski, i cili i përshkroi gjithçka po shikon këto ditë:

“Më tregoi dhimbjen e këtij populli, torturat e hatashme, monstruozitetet, më foli për kufomat e torturuara, që i pa me sytë e tij”.

Krajewski në lutje në Izyum, ku "lufta nuk e di ç’është mëshira"

Papa e kishte fjalën për Izyum, vendin ku u gjetën eshtrat e rreth 500 njerëzve dhe ku kardinali Krajewski qe i pranishëm në zhvarrosjen e disa  kufomave të ukrainasve të martirizuar në kuptimin më tronditës të kësaj fjale… Nuk kisha parë kurrë “kaq tmerr”,  të cilin nuk ka gojë që mund ta përshkruajë - i tha lëmoshtari papnor Françeskut në telefon. Në mes të këtij tmerri, Kardinali po vazhdon misionin e tij në Ukrainë, ku çon jo vetëm ndihma materiale, por edhe, e sidomos, ledhatimin  e Papës për njerëzit e  vënë në provën e rëndë të vdekjes dhe të shkatërrimit, ndërsa planifikon të çojë edhe më shumë ndihma në kryeqytetin Kiev.