Papa: mëshirë dhe keqardhje për popullin ukrainas të martirizuar

R.SH. - Vatikan

Bota ka shumë nevojë për mëshirë, veçanërisht Ukraina, e cila është në luftë që prej gjashtë muajsh. Në prag të solemnitetit të Zojës së Madhe, pas lutjes së sotme të Engjëllit të Tënzot, Papa Françesku i kërkoi Zotit mëshirë dhe keqardhje për popullin ukrainas të torturuar. Ati i Shenjtë kujtoi ngjarjen e 20 viteve më parë, në Krakov, kur Papa shenjt Gjon Pali II ia besoi botën Mëshirës Hyjnore:

“Një mendim i veçantë për shtegtarët e shumtë, që sot u mblodhën në Shenjtëroren e Mëshirës Hyjnore në Krakov, ku njëzet vjet më parë, Shën Gjon Pali II shqiptoi Aktin, me të cilin ia besoi botën Mëshirës Hyjnore. Sot e kuptojmë më shumë se kurrë atë gjest, të cilin duam ta ripërtërijmë me lutje dhe me dëshminë e jetës. Mëshira është rruga e shpëtimit për secilin prej nesh dhe për mbarë botën”.

Më pas, thirrja për popullsinë ukrainase:

“T’i kërkojmë Zotit mëshirë, mëshirë të veçantë, mëshirë dhe keqardhje për popullin ukrainas të martirizuar”.