Françesku bekon të rinjtë, shtegtarë në Santiago

R. SH. - Vatikan

Në përfundim të Engjëllit të Tënzot, Papa i përshëndeti dhe i bekoi të rinjtë që morën pjesë në shtegtimin evropian rinor në Santiago të Kompostelës, (Peg22) planifikuar për vitin 2021, Vit Shenjt i Kompostelës, shtyrë për shkak të Covidit:

“Me gëzim, bekoj përzemërsisht secilin prej të rinjve që morën pjesë, si dhe ata që punuan për organizimin dhe përcjelljen e kësaj ngjarjeje. Qoftë jeta juaj gjithmonë shtegtim me Jezu Krishtin, shtegtim drejt Zotit dhe drejt vëllezërve tuaj, shtegtim në shërbim dhe në gëzim!”.

Rreth 12,000 të rinj nga e gjithë Evropa morën pjesë në këtë shtegtim, i cili filloi më 3 gusht dhe përfundoi mëngjesin e sotëm me një Meshë, nismë e organizuar nga dioqeza Santiago e Kompostelës, në bashkëpunim me Konferencën e Ipeshkvijve Spanjollë, përballë Varrit të Apostullit, me moton “Djalosh, çohu dhe bëhu dëshmitar, të pret Shën Jakobi apostull”

Papa shprehu gjithashtu dhimbjen për aksidentin rrugor, të shtunën, më 6 gusht, në Kroaci ku, rrugës për në Medjugorje, humbën jetën 12 shtegtarë polakë, ndërsa të tjerë u plagosën. Papa kërkoi ndërmjetësimin e Zojës, “për të ta dhe për familjet e tyre”. Autobusi, që u nis një ditë më parë nga një qytet i vogël afër Varshavës, me 43 persona, duke përfshirë dy shoferët, si dhe tre priftërinj dhe gjashtë murgesha, pak pas orës 5 të mëngjesit, doli nga rruga rreth 60 kilometra në veri të Zagrebit. 18 nga të plagosurit janë transportuar në spitalet lokale. Prokuroria e Qarkut të Varshavës ka nisur një hetim për shkaqet e tragjedisë.