Puna e fëmijëve, Papa: tepër duar të vogla privohen nga dinjiteti
R.SH. – Vatikan
Varfëria është nëna e çdo shfrytëzimi. Mjerimi, që shoqërohet me mungesën e mbrojtjes së të drejtave më elementare, është “kafshatë, që s’kapërdihet” nga miliona njerëz çdo vit, duke filluar nga ata, që nuk kanë forcë për t’u mbrojtur. Janë vajza e djem të vegjël, të cilët i detyrojnë “të lërojnë ara, të punojnë në miniera, të bartin ujë edhe pse larg, të kryejnë punë, që i pengojnë të ndjekin shkollën, për të mos folur për krimin e prostitucionit të fëmijëve”. Këto fjalë të dhimbshme janë pjesë e mesazhit, që Papa Françesku i drejton sot Organizatës Botërore të Punës (ILO), me rastin e Konferencës së pestë globale, që po mbahet në Durban të Afrikës së Jugut, nga e diela e kaluar.
Të zhduken shkaqet e varfërisë
Mesazhin e lexoi dje, nunci apostolik, imzot Peter Bryan Wells, para një asambleje, që do t’i vazhdojë punimet deri të premten. Ati i Shenjtë shkruan se tragjedia e shfrytëzimit të fëmijëve është bërë edhe më e rëndë, për shkak të pandemisë, e cila ka ndikuar në përhapjen e varfërisë së skajshme në shumë anë të botës. Për ato “tepër duar të vogla”, që detyrohen të bëjnë gjithçka s’duhet të bëjë një fëmijë, Papa u kërkon “organizmave ndërkombëtare dhe kombëtare” të çrrënjosin “shkaqet strukturore të varfërisë globale dhe pabarazinë shkandulluese ndërmjet anëtarëve të familjes njerëzore”.
“Me vendosmëri”
Nga shfrytëzimi i punës, që shpesh çon në format më të këqija të çdo lloj abuzimi tjetër, miliona fëmijë privohen nga “gëzimi i rinisë dhe nga dinjiteti, që u ka dhuruar Zoti”. Prandaj, ngul këmbë Papa Françesku, Konferenca e ILO-s e ka për detyrë të ndërgjegjësojë më shumë për këtë çështje, në mënyrë që “të gjenden mënyra të përshtatshme e të frytshme për të mbrojtur dinjitetin dhe të drejtat e fëmijëve, sidomos përmes promovimit të sistemeve të mbrojtjes shoqërore dhe të arsimimit për të gjithë”.
Edhe Selia e Shenjtë dhe e gjithë Kisha, kujton Bergoglio, punojnë që fenomeni të luftohet nga të gjithë, me vendosmëri, për një zgjidhje përfundimtare, pasi masa me të cilën respektohet “dinjiteti njerëzor”, i dhuruar nga Zoti, si edhe të drejtat themelore të më të vegjëlve, “shpreh qartë ç’lloj të rriturish jemi dhe duam të jemi dhe ç’lloj shoqërie duam të ndërtojmë”.