Papa Françesku në Kanada nga 24 deri më 30 korrik

R.SH. - Vatikan

Papa e ka shprehur vazhdimisht dëshirën për të shkuar në Kanada, ku Kisha është e angazhuar në një proces të rëndësishëm pajtimi me popullin indigjen. Drejtori i Zyrës së Shtypit të Vatikanit, Matteo Bruni, njoftoi sot se Françesku do të jetë në vend nga 24 deri më 30 korrik, “me ftesën e autoriteteve civile, kishtare dhe të bashkësive indigjene”.

Është shtegtimi i 38-të apostolik i Papës, që do të vizitojë qytetet Edmonton, Québec dhe Ikaluit. Në audiencën e 1 prillit me delegacionet e popujve indigjenë të Kanadasë, që i pati takuar më parë edhe individualisht, Françesku preku plagët e një periudhe të vështirë e, duke kujtuar përkushtimin “për Shën Anën, gjyshen e Jezusit”, këtë vit - u premtoi - do të doja të isha me ju në ato ditë ”. Kujtojmë se festa e Shën Anës kremtohet më 26 korrik.

Dhimbje dhe turp për të kaluarën

Në të njëjtën audiencë, Papa kërkoi ndjesë për ngjarjet e së kaluarës, që dolën dramatikisht në dritë me zbulimin e një varri masiv në Shkollën Rezidenciale Indiane Kamloops. Histori abuzimi dhe dhune e kryer ndërmjet fundit të shekullit të 19-të dhe dhjetëvjeçarëve të fundit të shekullit të 20-të, kur qeveria kanadeze krijoi shkollat rezidenciale për t’i asimiluar kulturalisht fëmijët indigjenë. Shkollat ​​iu besuan kishave të krishtera lokale, përfshirë edhe atë katolike. Në këto ambiente përgjithësisht të pafinancuara, fëmijët shpesh keqtrajtoheshin dhe shpërdoroheshin:

“Ju kam thënë dhe e përsëris: ndjej dhimbje e turp kur kujtoj rolin që  luajtën katolikë të ndryshëm, sidomos me përgjegjësi arsimore, në gjithçka që ju lëndoi, në abuzimet dhe në mungesën e respektit për identitetin tuaj, kulturën tuaj dhe madje edhe vlerat tuaja shpirtërore. E gjithë kjo është në kundërshtim të plotë me Ungjillin e Jezusit”- u pati thënë Papa indigjenëve gjatë takimeve me ta, në Vatikan.

Rrugë drejt së vërtetës

Vizita e Papës është një nga etapat e rrugës së pajtimit, nisur nga Kisha Kanadeze, sapo doli në shesh e vërteta. Rrugë, që Françesku ftoi të ndiqet me vendosmëri sepse “procesi i rehabilitimit kërkon veprime konkrete”. Prej këndej, inkurajimi “për ta vazhduar kërkimin transparent të së vërtetës”, “për shërimin e plagëve dhe pajtimin” e për të nxitur rizbulimin dhe rigjallërimin e kulturës së vendasve, me dashuri, respekt dhe vëmendje të veçantë ndaj tyre e traditave të tyre.