Koncistori i 27 gushtit do të krijojë 21 kardinaj
R. SH. - Vatikan
Kardinaj, nga të katër anët e botës! Papa, në përfundim të lutjes së Mbretëreshës Qiellore, dha njoftimin për Koncistorin e ri, më 27 gushtin e ardhshëm, për krijimin e kardinajve të rinj. Eshtë Koncistori i tetë i papnisë së Françeskut.
“Të hënën e të martën, më 29 e 30 gusht, do të mbahet takimi i të gjithë kardinajve për të reflektuar mbi Kushtetutën apostolike Praedicate evangelium (Predikonie Ungjillin) e, të shtunë, më 27 gusht, do të mbaj koncistorin për krijimin e kardinajve të rinj” - njoftoi Papa nga dritarja e Pallatit Apostolik.
Tre krerë dikasteresh
Ndërmjet kardinajve të rinj janë tre krerë dikasteresh të Kuries romake: anglezi Arthur Roche, prefekt i Kongregatës për Kultin Hyjnor; koreani Lazzaro You Heung-sik, prefekt i Kongregatës së Klerit; spanjolli Fernando Vérgez Alzaga, president i Komisionit Papnor për Shtetin e Qytetit të Vatikanit dhe Guvernatoratin.
Kardinajtë e rinj
Njëherësh me ta, Françesku lartoi në misionin e kardinalit: Jean Marc Avelin, kryeipeshkëv i Marsilies; Peter Okpaleke, ipeshkëv i Ekwulobia, në Nigeri; Leonardo Steiner, kryeipeshkëv i Manhaus; Filipe Neri António Sebastião do Rosário Ferrão, kryeipeshkëv i Goa e Damao, Indi; Robert W. McElroy, ipeshkëv i San Diegos, SHBA; Virgílio do Carmo da Silva; kryeipeshkëv i Timorit lindor; ipeshkvi i Como-s, Oscar Cantoni; Anthony Poola, kryeipeshkëv i Hyderabad, Indi; Paulo César Costa, kryeipeshkëv i Brasilias; Richard Kuuia Baawobr, kryeipeshkëv i Wa, Ghana; William Goh Seng Chye; kryeipeshkëv i Singaporit; Adalberto Martínez Flores; kryeipeshkëv i Asuncion, Paraguay; Giorgio Marengo, prefekt apostolik i Ulan Bator, kryeqytet i Mongolisë. Ky i fundmi, 48 vjeç, është më i riu ndërmjet kardinajve të rinj.
Mbi tetëdhjetat
Me ta do të marrin kësulën e kuqe edhe pesë shërbëtorë të Zotit me moshë mbi tetëdhjetë vjeç që, për këtë arsye, nuk do të hyjnë në një Konklav të mundshëm. Janë: Jorge Enrique Jiménez Carvajal, kryeipeshkëv nderi i Cartagenë-s (Kolumbi); Lucas Van Looy, ipeshkëv nderi i Gent, Belgjikë; Arrigo Miglio, kryeipeshkëv nderi i Cagliari-t; atë Gianfranco Ghirlanda Si, profesor i Teologjisë; imzot Fortunato Frezza, kanonik i Shën Pjetrit.
“Të lutemi për kardinajtë e rinj që, duke e dëshmuar bashkimin e tyre me Krishtin, të më ndihmojnë në shërbesën e Ipeshkvit të Romës për të mirën e mbarë popullit të Zotit”- tha Papa në përfundim të leximit të listës së kardinajve të rinj.
Përbërja e Kolegjit Kardinalor
Kolegji kardinalor sot përbëhet nga 208 kardinaj, nga të cilët 117 zgjedhës e 91 jo zgjedhës. Më 27 gusht numri i kardinajve do të jetë 229, nga të cilët,132 zgjedhës.