Ukraina, Papa nxit t’i lutemi Marisë, Mbretëreshë e Paqes, për fundin e luftës
R. SH. - Vatikan
Në një tweet, që lexohet sot në faqen e internetit @Pontifex edhe në gjuhën ukrainase e atë ruse - Papa fton të lutemi së bashku për Ukrainën: “T’i kërkojmë Mbretëreshës së Paqes - shkruan - ta shtrijë mbi ne dorën e saj. E t’i lutemi: Nën mbrojtjen tënde kërkojmë strehë, o Nëna e Shenjtë e Zotit; mos i përbuz lutjet tona në këto çaste prove, por lirona nga çdo rrezik, o Virgjër e lumnueshme dhe e bekuar!”.
Në terren, pushimi i armëve, njoftuar sot nga ministria ruse e mbrojtjes, ishte thjesht shpresë e brishtë. Autoritetet bashkiake të Mariupol njoftuan se forcat ushtarake ruse nuk po e respektojnë armëpushimin gjatë gjithë udhës së caktuar. E shtojnë edhe se, për shkak të shkeljeve të vazhdueshme, u shty edhe evakuimi i civilëve nga Mariupol. Sipas ministrit të jashtëm rus, Serghei Lavrov, largimin e civilëve nga qyteti, po e pengojnë vetë autoritetet ukrainase.
Duam paqe – kjo thirrja e fuqishme, që arrin deri tek froni i Zotit!
Ndërsa bota mbarë bën thirrje për paqe, trupat ruse, si morën nën kontroll centralin bërthamor të Zaporizhzhias, më i madhi në Evropë, po i afrohen gjithnjë më shumë një centrali tjetër bërthamor. Duke folur, në Poloni, sekretari amerikan i shtetit, Blinken, deklaroi se po kërcënohen drejtpërdrejt paqja e siguria. “Do ta mbrojmë - deklaroi - çdo centimetër të territorit të Natos”.
Ndërkaq Fortlumturia e tij, kreu i Kishës greko-katolike, imzot Sviatoslav Shevchuk, iu drejtua bashkësisë ndërkombëtare, duke i kërkuar të japë ndihmesën që karvanet humanitare të mund të arrijnë në qytetet e rrethuara e refugjatët, nën strehët e huaja. E pikërisht situata e refugjatëve do të jetë në qendër të vëmendjes të hënën e ardhshme, në një takim të ri të Këshillit të Sigurimit të OKB-së kushtuar konfliktit në Ukrainë.