Bambino Gesù: Papa ledhaton fëmijët ardhur nga Ukraina

R. SH. - Vatikan

Dje pasdite, pak pas orës 16.00, Papa Françesku shkoi në Spitalin Pediatrik Bambino Gesù për të vizituar repartin ku janë shtruar fëmijët ardhur këto ditët e fundit nga Ukraina. E priti presidentja e spitalit, Mariella Enoc, që më pas e shoqëroi Atin e Shenjtë në repartet e ndryshme.

19 fëmijë ukrainas, nga lufta, “në krahët e Krishtit Fëmijë”

Vijnë nga vise të ndryshme të Ukrainës në flakë. Ikën nga bombat që, megjithatë, i lanë shenjat e tyre vrastare mbi trupat e njomë, duke u vulosur në kujtesë, tmerret e luftës. Ikën. Për të arritur në këtë vend, ku të gjithë vrapojnë t’u japin nga një ledhatim. Për t’i ndihmuar të harrojnë.

Në këto çaste - sipas njoftimit që u dha gazetarëve drejtori  i Sallës së Shtypit të Selisë së Shenjtë, Matteo Bruni - janë 19 fëmijë ukrainas të shtruar në repartet e ndryshme të spitalit, në selinë e Gianicolos, në Romë, e në atë të Palidoros, pak kilometra larg nga kryeqyteti.

Papa i vizitoi një për një. I ledhatoi. U ndalua për të shkëmbyer dy fjalë me prindërit.

Janë 50, fëmijët e ardhur nga Ukraina

Të vegjlit - kujtoi Bruni - ardhur në Bambin Gesù që nga fillimi i luftës në Ukrainë, janë rreth 50. Pacientë me sëmundje nga më të ndryshmet (onkologjike, neurologjike e të natyrave të tjera), të ikur që në ditët e para të sulmit rus mbi atdheun e tyre; por edhe të tjerë, që mbartën me vete mbi trupat e tyre të njomë, plagë të rënda, shkaktuar nga  bombat ruse.

Papa u ndalua krevat më krevat e i vizitoi të gjithë pacientët e vegjël, për t’u rikthyer, më pas, në Vatikan, si qe ndaluar ca çaste edhe me prindërit e tyre, ardhur në Romë bashkë me të vegjlit, të ngarkuar edhe më rëndë, me tmerret e konfliktit.