Papa është kthyer në Romë
R. SH. - Vatikan
Papa është kthyer në Romë. Avioni i Papës u ul në aeroportin romak Ciampino në ora 12.35. Përfundoi, kёshtu, udhëtimi i 35-të apostolike ndёrkombёtar në Qipro dhe Greqi.
Pra, Papa Françesku u largua nga trojet helenike, etapë e fundit e shtetgimit të tij apostolik në Qipro e Greqi. Udhëtimi nga Athina drejt aeroportit romak Ciampino do të zgjasë më pak se dy orë. Gjatë fluturimit parashikohet edhe konferenca e zakonshme e shtypit në bord, me gazetarët që e ndoqën vizitën papnore.
Mbetën pas tapeti i kuq, entuziazmi i popullit grek, kujtimi i fytyrave të gëzuara të emigrantëve, që ngjyrosin një shoqëri të formuar nga njerëz të plagosur në shpirt, por që patën fatin të marrin ngushëllimin e bashkësisë kishtare universale.
E edhe takimi me të rinjtë pranë Shkollës Shën Dionisit, i cili e vulosi këtë shtegtim, për t’u dhënë nxitje të fuqishme breznive të reja, që të mund t’i bëjnë ballë një ardhmërie me paqartësi e frikë.
Shpresa e hovet, që la pas Papa, janë trashëgimia njerëzore e shpirtërore e Pasardhësit të Pjetrit, që preku me dorë plagët e popujve qipriotë e grekë, ashtu si dhe të gjithë atyre, që shtegtojnë në ato, të cilat Papa i quajti “odiesetë moderne”, migrimet, në kërkim të një ardhmërie të lumtur e të një jete dinjitoze, e cila u mohohet njerëzve ndër vendet në luftë, ku heksodi duket si e vetmja rrugë shpëtimi.
Në kuadrin e këtij shtegtimi, në zemër të të cilit ishte dialogu, tejet vendimtar për këto troje, vihet një gur i ri në themelet e një magjisteri, që dëshiron të ndërtojë ura e të përqafojë popuj me stilin e vëllazërimit ungjillor.