Papa, nga Spitali Gemelli, kërkon kujdes mjekësor për gjithë të sëmurët

R.SH. - Vatikan

“Jam i kënaqur, që po e mbaj takimin e Engjëllit të Tënzot të së dielës, edhe këtu, në Poliklinikën Gemelli” - këto, fjalët e para të Papës, në këtë lutje të jashtëzakonshme, që besimtarët e shoqëruan me urimin e heshtur për ta parë “të Sëmurin e shumëdashur” sa më shpejt duke e kremtuar lutjen e së djelës nga dritarja e Engjëllit, mbi Sheshin e Shën Pjetrit.

Ishte himn falënderimi, lutja e sotme e Papës: falënderim drejtuar Zotit e njerëzve, për afërsinë dhe mbështetjen. “Faleminderit, nga e gjithë zemra!

 Sakramenti i Vajimit është si ledhatim, që të ngre përsëri në këmbë

E nga falënderimi, Papa kaloi menjëherë tek Ungjilli i kësaj së dieleje  që  na kujton se dishepujt e Jezusit, të dërguar nga Ai vetë “i lyenin me vaj shumë të sëmurë e i shëronin”(Mk 6,13), Ky vaj - kujtoi, duke vijuar komentin e faqes ungjillore, që të kujtonte një situatë shumë pranë vendit ku po kremtohej lutja, është sigurisht Sakramenti i Vajimit të të sëmurëve, që të jep  ngushëllim në shpirt e në korp:

“Po ky ‘vaj’ - kujtoi - është edhe dëgjim, afërsi, kujdes, dhembshuri nga ana e njeriut, që kujdeset për të sëmurin: është si ledhatim, që të bën ta ndjesh veten më mirë, të lehtëson dhimbjen e të ngre përsëri në këmbë. Të gjithë kemi nevojë, heret a vonë, për këtë ‘vajim’ e të gjithë mund t’ia japim tjetrit, me një vizitë, një telefonatë, një dorë të shtrirë drejt atij, që ka nevojë për ndihmë”.

Nga krevati i sëmundjes së tij, Papa mendon më shumë për dhembjet e të tjerëve, sesa të vetat, për lehtësimin e të tjerëve, për ngushëllimin e të tjerëve.

Papa vlerëson lart sistemin shëndetësor

Në këto ditë të shtrimit në spital - vijoi - provova sa i rëndësishëm është shërbimi i mirë shëndetësor, i mundshëm për të gjithë, si në Itali, ashtu edhe në vende të tjera. Një sistem shëndetësor, që ua siguron shërbimin të gjithëve.

“Nuk duhet humbur kjo pasuri e çmuar! Duhet ruajtur! E për këtë duhet të angazhohemi të gjithë, sepse u shërben të gjithëve e kërkon kontributin e të gjithëve”.

Këtë theksoi me forcë Papa, që këto ditë e provoi mbi vete sa rëndësi ka një shërbim shëndetësor i denjë për çdo njeri, pa asnjë dallim. E edhe për çdo vend të botës.

Falënderim, mjekëve e të gjithë punonjësve të shëndetësisë

Dëshiroj - tha në përfundim të kësaj lutjeje të shkurtër Papa i sapooperuar, duke u folur njerëzve, që qenë mbledhur edhe poshtë dritares së spitalit - e edhe atyre. që e ndiqnin nga të katër anët e botës - t’u shpreh vlerësimin dhe inkurajimin tim mjekëve dhe të gjithë punonjësve shëndetësorë si dhe personelit të spitaleve. E më pas, ftesa  drejtuar besimtarëve që të luten për të gjithë të sëmurët:

“Askush nuk duhet lënë vetëm. Uroj që secili ta marrë vajimin e dëgjimit, të afërsisë e të kujdesit. E kërkojmë me ndërmjetësimin e Marisë, Nënës sonë,  Shëndeti i të sëmurëve”.