Skllavëria moderne e fëmijëve: thirrje e fuqishme e Papës
R. SH. - Vatikan
Të mitur pa të drejtë për të luajtur, për të studiuar, për të ëndërruar: kjo, drama e 150 milionë të vegjëlve, të shfrytëzuar deri në palcë, që Papa e kujtoi pas lutjes së Engjëllit të Tënzot, duke kërkuar të zhduket kjo plagë, që u kujtua në Ditën Botërore, kremtuar më 12 qershor.
Skllavëria moderne e fëmijëve: thirrje e fuqishme e Papës
“Nuk mund t’i mbyllim sytë përballë shfrytëzimit të fëmijëve. Të miturve pa të drejtë për të luajtur, për të studiuar, për të ëndërruar”. Është thirrja e Papës Françesku, pasi kujtoi të dhënat e Organizatës Ndërkombëtare të Punës:
“Sot në botë shfytëzohen 150 milionë fëmijë: pak a shumë sa të gjithë banorët e Spanjës, së bashku me ata të Francës dhe të Italisë. Kjo ndodh sot! E të shumtë janë fëmijët, që vuajnë kështu, që shfrytëzohen në punët më të rënda. Të përpiqemi të gjithë për ta zhdukur këtë skllavëri të kohëve tona”.
E nesërmja është e fëmijëve, që ne i mbrojmë sot
Dje u kremtua Dita Botërore kundër punës së të miturve. Ndaj Papa kërkoi përsëri të mos i mbyllim sytë përballë shfrytëzimit të fëmijëve. E nesërmja është pikërisht e atyre, që ne i mbrojmë sot - kujtoi pas lutjes së Engjëllit.