Muaji i Marisë: në Kopshtet e Vatikanit, Rruzarja e udhëhequr nga Papa
R. SH. - Vatikan
Nesër, 31 maj, përfundon muaji i lutjes për të kërkuar fundin e pandemisë dhe rifillimin e veprimtarive shoqërore. Domethënë, fillimi i punës normale, që u ndërpre nga sëmundja. E edhe muaji i Zojës. Papa do t’i prijë Rruzares në Kopshtet e Vatikanit, lutje që do të paraprihet nga një procesion solemn. Procesionin do ta shoqërojnë edhe fëmijët e famullisë Shën Maria della Grotticella të Viterbos, që morën Kungimin e parë. Kjo famulli, e para në Itali, vuri në dispozicion të Asl-it të qytetit lokalet e veta, duke i shndërruar në qendër vaksinimi. Famullitari, don Giuseppe Curre, përshkruan, për Vatican News, gëzimin e fëmijëve, kur e morën vesh lajmin:
“Ishte lajm i bukur për të gjithë, edhe për mua. Kur ua dhashë fëmijëve e katekisteve, shpërtheu hareja. Kënaqësi e vërtetë, kjo!”.
Nesër, për fëmijët që do të luten në Kopshtet e Vatikanit pranë Papës, do të jetë një çast i veçantë, pikërisht pas kësaj kohe të trazuar nga lockdown, nga distancimi:
“U mësuam, në përgatitje për Kungimin, të bënim një shtegtim e të shkonim në Bolsena, në vendet e mrekullisë eukaristike. Ndërsa sivjet nuk mundëm të shkojmë. Por patëm këtë hirin tjetër: u thirrëm të shkojmë në Romë, pranë Papës. Nuk mund të kishim hir më të mirë e më të bukur për fëmijët tanë. Jantë të gjithë plotësisht të kënaqur, përplot me entuziazëm.