Dalla Torre, Papa: njeri i nderuar i kulturës e dëshmitar i ndritur i fesë
R. SH. - Vatikan
“Jurist i shquar, burrë i nderuar kulture e feje, bashkëpunëtor i ngushtë i Selisë së Shenjtë”, por sidomos, njeri i aftë për të dhënë “dëshmi të mirëfilltë të krishterë”. Këto cilësi të të ndjerit vihen në pah, duke kujtuar jetën dhe veprimtarinë e tij si pedagog, si kryetar i Gjykatës së Shtetit të Qytetit të Vatikanit e si rektor i palodhshëm i Universitetit të Lirë Santa Maria Assunta(Lumsa) në një telegram të Papës, nënshkruar nga sekretari i Shtetit, kardinali Pietro Parolin, në të cilin kujtohet fuigura e Giuseppe Dalla Torre Del Tempio di Sanguinetto, që ndërroi jetë më 3 dhjetor, 77 vjeç, i goditur nga Covid 19.
Papa ngushëllon familjarët
Papa, si u njoftua për vdekjen e “profesorit të dashur”, u shprehu afërsinë e tij shpirtërore bashkëshortes Nikoletta dhe së bijës, Paola, duke kujtuar me mirënjohje të thellë cilësitë e tij të rralla njerëzore dhe profesionale.
Ndërsa kardinali Pietro Parolin shtoi edhe ngushëllimet e tij personale, duke shprehur, pak para telegramit, datuar 3 dhjetor, gjatë homelisë mbajtur në Meshën e Dritës, dhimbjen e tij për humbjen e këtij burri të madh, të mirë, të përvujtë e të urtë”.
Ishte një homeli jashtëzakonisht prekëse, e shqiptuar plot pasion, për t’i dhënë lamtumirën e fundit një miku, “që do t’i mungojë tepër të gjithë atyre, të cilët e deshën dhe e nderuan aq shumë”. Hirësia e Tij Parolin e quajti të vdekurin “dishpull i vërtetë i Krishtit”, i cili “si Shën Gjon Pagëzuesi e shkriu gjithë jetën duke dhënë dëshmi për Dritën”.
Tejet prekëse, të lësh pas kaq shumë dashuri e dritë!