Kërko

Vatican News
 Covid-19 në Panama Covid-19 në Panama  (AFP or licensors)

Panama, lufta kundër Covid-19: dhurata e Papës për indigjenët, migrantët, të burgosurit

Në këto çaste krize pandemike, Papa shqetësohet posaçërisht për më të ligshtit. Ndaj, me një gjest të ri bamirësie, dërgon mjete shëndetësore për matjen e temperaturës e për vlerësimin e situatës të përhapjes së sëmundjes në burgje, qendra strehimi dhe në bashkësitë e vogla indiane.

R. SH. - Vatikan

Termometra dixhitalë për bashkësitë indigjene, migrantët, të burgosurit. Dhurata e Papës për kryediqezën e Panamasë arriti në vend. Kryeipeshkvi Josè Domingo Ulloa dhe delegati i Nunciaturës për marrëdhëniet institucinale, atë Gilber Tsogli ia dorëzuan drejtpërdrejt Ministrit të jashtëm, Alejandro Ferrer: “Me këtë gjest Papa dëshmoi edhe një herë  dashurinë e tij të veçantë për më të ligshtit e edhe për Panamanë” - pohoi prelati në përfundim të takimit. “Termoskaneret - shtoi -  janë për ata që rrezikohen më shumë e që mund të sëmuren më shpejt për shkak të mbipopullimit dhe të vështirësive për të siguruar shërbimet kryesore shëndetësore”.

Gjendja ndër burgje

Imzot Ulloa theksoi, posaçërisht, problemin e burgjeve panameze: “Në burgje vuajnë dënimin më se 17.800 të burgosur. Prej tyre, sipas burimeve qeveritare të informimit të datës 4 qershor, 665 janë të infektuar. Pritet që numri të bëhet gjithnjë më i madh. E dimë edhe se në burgun e Santiagos, në Veraguas, 313 të burgosur janë  prekur tashmë nga virusi. Një prej tyre ka vdekur”.

Migrantët dhe popullsia autoktone

Jo më pak shqetësuese është edhe situata e migrantëve: “Në Darién janë dy qendra strehimi, ku ka hyrë më parë Covid-19, sesa migrantët. Situata më kritike është në La Penita ku, në majin e kaluar, ishin të pranishëm 1694 vetë, shtatë herë më shumë se kapaciteti i vendstrehimit. “Përfaqësojnë 11% të popullsisë prej 4 milionë banorësh” - shpjegon kryeipeshkvi i Panamasë. “Jetojnë në pesë zona të vendit, ku mund të arrihet me vështirësi. Edhe këtu vijon të rritet çdo ditë numri i të prekurve nga Pandemia!”.

30 gusht 2020, 09:00