Lutja kundër dhunës për të rinjtë, në Madagaskar

R. SH. - Vatikan

Në përfundim të mbrëmësores së lutjes, në sheshin dioqezan të Soamandrakizay të Antatanarivos, Papa Françesku “u rrethua”, në tribunë nga një grup  të rinjsh që, me ritmin e  këngëve të tyre,  deshën ta bëjnë të bashkohej me ta në valle. E Papa, për ca çaste, nuk ua prishi qejfin e mbeti i rrethuar nga grupi i valltarëve, që shtrëngohej në formë rrathësh rreth tij, duke brohoritur, me ritmin e këngëve afrikane: “Kjo është rinia e Papës!”.

Para se të shkëputej nga vallja e tyre e të ndahej me të rinjtë, Papa u drejtoi këto fjalë:

“Brezni të reja malgashe, ju lëshoj në dorë të Zojës së Bekuar që t’ju mbrojë nga globalizimi, shpesh i ndotur prej kulturës së hedhurinës e t’ju prijë përpara në shtigjet e jetës e të shenjtërisë!”.

Më pas, duke iu drejtuar Zojës së Bekuar, ia porositi të rinjtë me fjalët prekëse:

“Mbroji nga tundimi i dhunës e ndihmoi në luftën kundër varfërisë, analfabetizmit e  përjashtimit nga radhët e shoqërisë. Marrshin forcë nga rrënjët e tyre, për t’u bërë ndërtues urash e për të dhënë ndihmesën në agimin e një shoqërie më të drejtë e më vëllazërore. Ndërmjetëso, që të  mund të mbjellin shpresë e të korrin begati!”.