Papa autorizon shtegtimet në Medjugorje
R. SH. - Vatikan
Papa vendosi t’i autorizojë shtegtimet në Medjugorje, domethënë tani e tutje mund të organizohen zyrtarisht nga dioqezat e famullitë e nuk do të bëhen më në formë private, siç janë bërë deri tani. Lajmi u dha sot, gjatë Meshës në famullinë-shenjtërore, që është bërë prej kohe cak shtegtimesh për miliona besimtarë, nga nunci apostolik në Bosnjë-Hercegovinë, Luigi Pezzuto dhe kryeipeshkvi Henryk Hoser, vizitator apostolik me karakter të veçantë i Selisë së Shenjtë.
Drejtori i përkohshëm i Sallës së Shtypit të Selisë së Shenjtë, Alessandro Gisotti, duke iu përgjigjur pyetjeve të gazetarëve për këtë çështje, saktësoi se këto shtegtime do të interpretohen si vërtetim i ngjarjeve, por që kërkojnë shqyrtim të mëtejshëm nga ana e Kishës. Duhet, prandaj, të shmanget konfuzioni a mëdyshja, që mund të krijojnë këto shtegtime, në aspektin doktrinor. Kjo ka të bëjë edhe me barinjtë e çdo urdhëri e grade, që duan të shkojnë në Medjugorje e të kremtojnë ose të bashkëkremtojnë në mënyrë solemne.
Vëmendje baritore
Duke e konsideruar të dendur valën e njerëzve, që shkojnë në Medjugorje, e duke parë frytet e begata të hirit, që burojnë prej tyre - vijon Gisotti - ky autorizim flet për vëmendjen baritore, që Ati i Shenjtë vendosi t’i kushtojë këtij realiteti, për të favorizuar, kështu, frytet e së mirës.
Vizitatori apostolik - përfundon zëdhënësi - “do ta ketë, kështu, më lehtë për të vendosur - në bashkëpunim me ipeshkvijtë e vendit - marrëdhënie me meshtarët e ngarkuar për organizimin e shtegtimeve në Medjugorje, si njerëz të sigurt e të mirëpërgatitur për këto shtegtime.
Vendimi i Papës merret një vit pas emërimit të Hoser, Kryeipeshkëv-nderi i Varshavë-Pragës në Poloni, si vizitator apostolik me karakter të veçantë për Famullinë e Medjugorjes, për një kohë të pacaktuar dhe “ad nutum Sancta Sedis”, domethënë, në dispozicion të Selisë së Shenjtë, që më 31 maj 2018.
Si emërimi, ashtu edhe njoftimi i sotëm, nuk hyjnë në çështje doktrinore përsa i përket vërtetësisë së tregimit të gjashtë vegimtarëve, lidhur me çka ndodhi në Medjugorje, duke nisur nga qershori 1981, fenomen ende i papërfunduar. Gjashtë vegimtarët, asokohe fëmijë ose adoleshentë, sigurojnë se kanë akoma dukje të përditshme të “Mbretëreshës së Paqes”, gjithnjë në të njëjtën orë të pasdites e kudo që ndodhen: janë Vicka (me banim në Medjugorje), Maria (në Monza), e Ivani (në SHBA, por që kthehet shpesh në atdhe). Vegimtarja e katërt, Mirjana, tregon se ka vegime çdo muaj, ditën e dytë; ndërsa dy ish-çunave të Medjugorjes, kjo u ndodh vetëm në herë në vit.
